MCC-ja prezanton planet investive para shoqërisë civile
MCC-ja prezanton planet investive para shoqërisë civile
21.04.2017 | 17:27
Zyra e Sfidave të Mijëvjeçarit (MCC) pranë Zyrës së Kryeministrit të Republikës së Kosovës ka organizuar të premten një tryezë të rrumbullakët me përfaqësues të OJQ-ve, në të cilën u prezantuan planet preliminare të investimeve të agjencionit amerikan MCC në Kosovë.
Organizatat e pranishme në këtë tryezë operojnë në fushat sociale dhe ambientale në Kosovë, dy fusha që mbulohen me projektet e planifikuara.
Në fjalën e tij të hapjes, koordinatori nacional, Petrit Selimi, ka falënderuar organizatat pjesëmarrëse për ndihmën që i kanë dhënë Zyrës së Sfidave të Mijëvjeçarit për të identifikuar në Kosovë fushat e mundshme të investimeve transformative për rritje ekonomike, zvogëlim të varfërisë dhe krijim të vendeve të reja të punës.
Ai ka bërë me dije se ekipi i MCC-së tashmë është në fazën përfundimtare të planifikimit të projekteve. Selimi ka treguar se ky planifikim bëhet sipas metodologjisë formale të përdorur në tërë botën, kurse në qershor pritet edhe formalizimi i marrëveshjes në mes të MCC-së dhe Qeverisë së Kosovës.
Sipas tij, kjo marrëveshje pritet sjell dhjetëra milionë dollarë investime të freskëta në zhvillimin ekonomik.
Po ashtu, Selimi ka informuar të pranishmit që ka angazhuar një kompani ndërkombëtare e cila është në proces të kryerjes së sondazhit të shfrytëzimit të kohës nga ana e fuqisë punëtore në tërë Kosovën, me fokus te gratë.
Sipas Selimit, ky studim, i pari i këtij lloji në Kosovë, do të përfshijë 10 mijë respodentë (familje), të cilët pritet të ofrojnë informacion të jashtëzakonshëm që do të mund të përdoret nga të gjitha grupet e interesit dhe institucionet që zhvillojnë politika dhe strategji, për të adresuar problemin e papunësisë në vendin tonë. “Përfshirja e gruas në tregun e punës në Kosovës është alarmuese. Ekspertët tanë lokal dhe ata nga Uashingtoni janë kujdesur që secili projekt i dorëzuar për aprovim, të ketë elaborim të kujdesshëm për mënyrat e përfshirjes gjinore”, ka thënë Selimi.
Ekspertët e Zyrës së Sfidave të Mijëvjeçarit në Kosovë dhe përfaqësuesit e MCC nga Uashingtoni, gjatë vizitave të shumta në Kosovë në proces të dizajnimit të projekteve janë takuar me disa qindra bashkëfolës nga komuniteti i donatorëve, institucione kosovare, shoqëri civile si dhe përfaqësues të biznesit.
Kualifikimi i Kosovës për një nga programet më inovative dhe transformative të ofruara në Kosovë, e obligon vendin tonë të punojë dhe raportojë për arritjet e standardeve të larta në qeverisje të mirë, luftim të korrupsionit dhe liritë ekonomike. Kosova është parakualifikuar për programe të MCC në dhjetor të 2015, ndërsa projektet e para pritet të aprovohen dhe fillojnë së implementuari gjatë 6 muajve të ardhshme.
List of videos