Mustafa: Do të përshpejtohen hapat për funksionalizimin e Aeroportit të Gjakovës
Mustafa: Do të përshpejtohen hapat për funksionalizimin e Aeroportit të Gjakovës
21.04.2017 | 17:03
Kryeministri i Kosovës, Isa Mustafa, ka vizituar të premten Aeroportin e Gjakovës, ku u prit nga kryeshefja ekzekutive e Aeroportit të Gjakovës, Vlora Gojani, anëtarët e Bordit dhe të ekzekutivit.
Në takim ishin të pranishëm edhe kryetarja e Komunës së Gjakovës, Mimoza Kusari- Lila, ministri i Forcës së Sigurisë së Kosovës, Haki Demolli, ai i Infrastrukturës, Lutfi Zharku dhe drejtori i Aviacionit Civil.
Kryeministri Mustafa u njoftua në detaje për asetet që i disponon Aeroporti i Gjakovës si dhe mundësitë e funksionalizimit të tij.
Më pas, kryeministri ka vizituar ambientet ku mbahen pajisjet për mirëmbajtjen e pistës dhe pjesës tjetër të aseteve të Aeroportit.
Para medieve të pranishme, kryeministri Mustafa, ka thënë se ky Aeroport është një aset shumë i rëndësishëm i zhvillimit ekonomik të Gjakovës dhe të Kosovës, i cili nuk duhet të mbahet në pasivitet. “Ju i shihni këto pajisje që kanë një vlerë shumë të veçantë dhe është keq që janë jashtë përdorimit. E kemi një pistë të shkëlqyeshme të Aeroportit, një ambient i cili është tepër i mirë për Kosovën, por edhe për zhvillimin ekonomik të Gjakovës. Ne u morëm vesh që të punojmë të gjithë së bashku, edhe ministritë përkatëse, edhe agjencionet qeveritare, por edhe Komuna, Bordi dhe menaxhmenti i këtij Aeroporti në mënyrë që të gjejmë alternativat më të mira sa më shpejt”, është shprehur Mustafa.
Ai ka thënë se Qeveria do të marrë për obligim që të sigurojë financimin që Bordi, menaxhmenti dhe punonjësit që merren me administratën dhe sigurinë e Aeroportit, të vazhdojnë dhe të kenë mundësi që të punojnë. “Do të bëjmë një studim të fizibilitetit dhe të kërkojmë edhe partneritet ndërkombëtar për këtë studim dhe pastaj të ofrojmë alternativat më të mira për shfrytëzimin e këtyre aseteve dhe për gjenerimin ekonomik edhe për Gjakovën edhe për Kosovën në tërësi”, ka deklaruar kryeministri Mustafa, duke bërë me dije se në këtë drejtim do të punohet më shpejtë dhe nuk do të lihen asetet e tilla jashtë përdorimit.
Ndërkaq, lidhur me punën që po bëhet për blerjen e helikopterëve, kryeministri Mustafa ka thënë se këto janë projekte, të cilat kanë qenë më parë të ndërlidhura me FSK-në, me Policinë e Kosovës dhe Ministrinë e Shëndetësisë, sepse në ato fusha ka nevojë që të mbulohen nevojat emergjente. “Ka qenë një komision i cili ka punuar mjaftë gjatë. I ka studiuar të gjitha kushtet dhe ne tani e kemi autorizuar që të rrumbullakojmë atë pjesë, të gjejmë adresat ose furnitorët kryesorë, me të cilët ne mund të bëjmë kontraktimin e helikopterëve, natyrisht duke kaluar të gjitha fazat ligjore të kësaj. Edhe ky ambient këtu, për të cilin po flasim, është një ambient i përshtatshëm edhe për atë njësit të helikopterëve edhe për aeroplanë të vegjël, të cilët ne mund t’i kemi nesër si Kosovë, qoftë si aeroplanë qeveritarë, qoftë ata që shfrytëzohen për nevoja komerciale dhe për nevoja tjera, prandaj është një kompleks i punëve që ne bashkërisht do ta bëjmë”, është shprehur ai.
Ndërkaq kryetarja e Gjakovës, Mimoza Kusari-Lila, ka thënë se me kryeministrin Mustafa kanë biseduar për format dhe mënyrat më të mira të funksionalizimit të Aeroportit e Gjakovës.
List of videos