Ambasada e Britanisë së Madhe në Kosovës ka mbajtur ceremoninë e Ditës së Përkujtimit të Mbretërisë së Bashkuar, në të cilën janë kujtuar të gjithë ata që humbën jetën gjatë shërbimit të tyre me Forcat e NATO-s në Kosovë.

Të pranishëm në këtë ceremoni, krahas ambasadorit Nicholas Abbott ishin edhe kryetari i Kuvendit të Kosovës, Glauk Konjufca, ministri i Mbrojtjes, Armend Mehaj, komandanti i FSK-së, Bashkim Jashari si dhe lideri i AAK-së, Ramush Haradinaj, të cilët kanë bërë homazhe te memoriali kushtuar ushtarëve të Mbretërisë së Bashkuar të rënë në misionin e tyre paqeruajtës në Kosovë.

Ambasadori i Britanisë së Madhe në Kosovë, Nicholas Abbot, e ka vlerësuar këtë ditë si një rast të veçantë për të kujtuar sakrificën e gjithë atyre që luftuan dhe vazhdojnë të luftojnë për liri, derisa përmendi edhe luftën në Ukrainë.

“Ky është gjithmonë një rast i veçantë, mendoj, për mua, si ambasador britanik. Gjithmonë i veçantë për shkak të gjithçkaje që sjellë me vete, të gjitha kujtimet e asaj që ka ndodhur në të kaluarën, por gjithashtu mendoj, veçanërisht këtë vit, duke kuptuar se lufta po ndodh përsëri në Evropë dhe duke parë se çfarë po ndodh në Ukrainë, po kujtojmë jo vetëm sakrificën e atyre që kanë ardhur para nesh, por edhe sakrificën e atyre që po luftojnë tani, po luftojnë për lirinë e tyre, për pavarësinë e tyre. Ndaj, shpresoj që edhe ata të jenë sot në mendjen tuaj”, ka thënë ambasadori Abbot.

Ndërsa nënkoloneli dhe përfaqësuesi i lartë kombëtar për forcat e armatosura të Mbretërisë së Bashkuar në Kosovë, Benjamin Ingham, ka thënë se është e domosdoshme të kujtohet edhe angazhimi i gjithë pjesëtarëve të forcave të armatosura, jo vetëm atyre që humbën jetën por edhe atyre që shërbejnë në operacionet ushtarake.

“Sot është një ngjarje jashtëzakonisht e rëndësishme, jo vetëm për pjesëtarët e forcave të armatosura britanike që janë sot në Kosovë, por edhe për të gjithë pjesëtarët e forcave të armatosura të Mbretërisë së Bashkuar që festojnë ceremoninë e Ditës së Përkujtimit sot. Është e domosdoshme që të kujtojmë përkushtimin vetëmohues dhe angazhimin e të gjithë pjesëtarëve të forcave të armatosura, jo vetëm atyre që humbën jetën, por edhe atyre që shërbejnë në operacionet ushtarake”, ka thënë Inghami.

Në anën tjetër, kapelani Rev Dr Gary Watt, ka thënë se shumë njerëz vijnë në Kosovë për të shijuar natyrën në male, të cilët përballen me sfidë teksa ngjiten në to.

“Shumë njerëzve u pëlqen të vijnë në Kosovë, të ngjiten në male dhe të përballen me një sfidë. Nuk e di nëse e bëni këtë këtu, por në Skoci, kur njerëzit ngjiten në male, ata në majë të malit mbledhin disa gurë dhe i vendosin njëri mbi tjetrin si shenjë kujtimi, si shenjë se në atë vend është arritur diçka. Është mjaft e vështirë të ngjitesh…sidomos në moshën time, nuk është gjëja më e lehtë në botë për ta bërë, dhe është mirë mund të lëni një shenjë për këtë sepse kur njerëzit dalin në atë mal, ata mund t’i shohin gurët atje dhe të thonë se njerëzit e tjerë kanë kaluar në këtë shteg, kanë qenë këtu më parë, që njerëz të tjerë janë ngjitur në këtë mal dhe ata kanë arritur të njëjtën sfidë si unë”, është shprehur ai.

Ndërkohë, kreu i Aleancës për Ardhmërinë e Kosovës (AAK), Ramush Haradinaj, ka shkruar në “Facebook”  se i është  bashkuar me aleatët tonë strategjik, në shënimin e Aktit të Përkujtimit, ditë kur Britania e Madhe dhe Commonwealth-i, kujtojnë të rënët që nga Lufta e Parë Botërore.