Raportet për raketa të reja që shkatërronin radarët rusë në Ukrainë u shfaqën në fillim të gushtit, pasi blogerët rusë raportuan për herë të parë se ishin zbuluar fragmente të një rakete HARM që goditi një vend raketash antiajrore ruse në Ukrainë.

Menjëherë pas kësaj, Pentagoni konfirmoi zyrtarisht se kishte dorëzuar AGM-88 HARM në Forcën Ajrore të Ukrainës – raketa të shpejta antiajrore të dizajnuara për të shkatërruar radarët e mbikëqyrjes dhe shënjestrimin e armikut të PZO.

Portali i specializuar ushtarak The War Zone thekson se zyrtarët ushtarakë amerikanë ndërkohë janë bindur se Forcat Ajrore të Ukrainës po përdorin në mënyrë aktive raketat HARM me një shkallë të mjaftueshme suksesi dhe kanë vendosur t’u dërgojnë atyre më shumë nga këto raketa.

Ushtria e Volodymyr Zelensky-t mori versione të modernizuara të raketave AGM-88 HARM dhe analistët ushtarakë vlerësojnë se përdorimi i tyre në fushën e betejës mund të ketë një ndikim të rëndësishëm në çaktivizimin e mbrojtjes ajrore ruse.

Prania e AGM-88 krijon probleme të mëdha për radarët rusë në mbrojtje kundër helikopterëve dhe avionëve ukrainas, si dhe për radarët kundër baterive të përdorura për lokalizimin e artilerisë ukrainase, duke përfshirë raketat e fuqishme HIMARS dhe MLRS me raketa me shumë tyta të prodhuara nga SHBA.

Përkatësisht, raketat antiradar zbulojnë frekuencat e transmetuara nga radarët e mbrojtjes ajrore ruse dhe më pas synojnë dhe shkatërrojnë sistemet e radarëve.

Pasi, dy javë më parë, u shfaqën në internet video të raketave AGM-88, nënsekretari i Departamentit të Mbrojtjes për Politikën e SHBA-së, Colin Kahl, pranoi se ukrainasit ishin furnizuar me raketa antiradar të prodhuara nga SHBA, dhe tani një tjetër zyrtar ushtarak i Biden, në një konferencë me gazetarët amerikanë, sqaroi më tej se ukrainasit i integruan këto raketa në MiG-29 të tyre.

Amerikanët i përdorën këto raketa në operacionet në Libi, Irak, si dhe në vitin 1999 në Serbi, kur komuniteti ndërkombëtar humbi durimin me politikën agresive të Sllobodan Millosheviq dhe vendosi të ndërhyjë ushtarakisht për të parandaluar spastrimin etnike të shqiptarëve të Kosovës.

Raketat AGM-88 HARM aktualisht përdoren nga 15 vende në botë. Raketa HARM është e gjatë 4.3 metra dhe peshon 363 kilogramë. Ka një distancë prej 48 kilometrash dhe një shpejtësi maksimale prej 2 mach, që është dyfishi i shpejtësisë së zërit.

Raketat antiradar nuk janë armë mrekullie, por në momente vendimtare ato mund të kthejnë valën në fushën e betejës. Kur nisen përpara një sulmi ajror, ata mund të shtypin mbrojtjen kundërajrore dhe të pastrojnë një shteg të sigurt për avionët miqësorë.

Avantazhi antiradar i Ukrainës ka të ngjarë të jetë i përkohshëm ndërsa ushtria ruse përshtatet, por tani prania e raketave AGM-88 në fushën e betejës i bën trupat ruse të mendojnë dy herë përpara se të ndezin radarët e tyre.

Një analist i Business Insider deklaron se “sezoni i gjuetisë për radarët rusë është i hapur”. Ai beson se shtypja e sistemeve ruse të radarëve kundër baterive do të ndihmojë në mbrojtjen e artilerisë ukrainase, veçanërisht raketave me shumë fuqi HIMARS me të cilat u kryen sulme shkatërruese në depot ruse të municioneve, postet komanduese dhe urat e rëndësishme për furnizimin e ushtrisë ruse.

“Raketat antiradar janë gjithashtu një armë psikologjike. HARM nuk do të mbyllë plotësisht radarët rusë, por do t’i bëjë operatorët e tyre shumë më selektivë në përdorimin e tyre,” vlerëson ai.

The War Zone shkruan se dërgimi i raketave AGM-88 tek ukrainasit tregon gatishmërinë e shtuar të autoriteteve amerikane për të përfshirë sisteme më të avancuara të armëve në paketën e re të ndihmës.

“Dorëzimi i raketave HIMARS dhe GMLRS, si dhe planet për blerjen e sistemit kundërajror tokë-ajër me rreze të mesme dhe të gjatë NASAMS, janë tregues se si ka ndryshuar politika amerikane në këtë front në muajt e fundit, raporton The War Zone, duke cituar një njoftim të një zyrtari amerikan i cili thekson se NASAMS do t’u dorëzohet ukrainasve brenda dy deri në tre muajve të ardhshëm.

Është një sistem norvegjeze-amerikan, dhe NASAMS do të thotë Sistemi i avancuar i raketave norvegjeze sipërfaqe-ajër. NASAMS u zhvillua nga prodhuesi më i madh shtetëror i raketave norvegjeze Kongsberg Defense & Aerospace dhe Raytheon i Amerikës, prodhuesi më i madh në botë i raketave të drejtuara./KP