Agjencia e Statistikave të Kosovës (ASK) ka mbajtur konferencën e radhës për medie lidhur me ecurinë e punës gjatë javës së gjashtë në terren për regjistrimin e popullsisë, ekonomive familjare dhe banesave në Kosovë.

Ushtruesi i detyrës së kryeshefit ekzekutiv të ASK-së, Avni Kastrati, ka theksuar se disa komuna kërkojnë shtyrjen e procesit të regjistrimit, ndërsa deri më tani janë regjistruar 1 milion e 420 mijë e 148 qytetarë.

Kastrati, ka thënë se procesi i regjistrimit po vazhdon edhe në javën e gjashtë.

Ai ka thënë se procesi i votimit ka shkuar mirë, disa komuna kanë kërkuar të shtyhet afati i regjistrimit, mirëpo, Kastrati tha se sipas mënyrës që ka shkuar procesi i regjistrimit deri më tani nuk e shohin të arsyeshme shtyrjen e afatit.

“Një komunë ka kërkuar përmes një shkresë të shtyhet në aspektin statistikor nuk ka arsye me u shty. Në përgjithësi regjistrimet kanë qenë aktiv, ka thirrje masive me u regjistruar ka një lloj frike te qytetarët se nëse nuk regjistrohen. Bëj thirrje regjistruesve të bëjnë edhe një vizitë sidomos te banesat e shprazëta mos ka mbet dikush pa u regjistruar”, ka thënë ai.

Kastrati ka thënë se në disa komuna janë hapur zyre ku qytetarët munden të shkojnë të regjistrohen. Këto komuna janë Prishtina dhe Prizreni, por e njëjta mund të ndodhë edhe në komuna tjera nëse e shohin të nevojshme.

Ndërsa në Prishtinë, qytetarët mund të regjistrohen në ASK, edhe në komunë.

Kurse, sa i përket regjistrimit në komunat veriore, Kastrati tha se ka hezitime, por pritet edhe këto ditë të vazhdojë regjistrimi. Regjistruesve iu bë thirrje të bëjnë edhe një rishikim në shtëpi të pabanuara.

“Regjistrimi po shkon sipas planit nga dje deri sot janë regjistruar numri. Komunitetet po marrin pjesë në veri ka hezitim, presim edhe këto ditë të regjistrohen”, ka thënë Kastrati.