Deputeti i Partisë Demokratike të Kosovës (PDK), Ferat Shala, ka reaguar pas caktimit të vlerës së koeficientit prej 105 eurosh për pagat e punëtorëve të sektorit publik.

Ai ka thënë se me këto veprime, qeveria Kurti është duke e stimuluar shpërnguljen e rinisë.

“Fatkeqësisht hap mundësinë dhe stimulon ikjen e fuqisë punëtore, në kërkim të alternativave më të mira drejt Evropës. Pra stimulon shpërnguljen e rinisë dhe zvogëlon shpresën për një jetë normale në Kosovë”, ka shkruar Shala në “Facebook”.

Postimi i plotë i Shalës:

Caktimi i koeficientit prej 105 euro nuk është meritor.

Në rrethanat çfarë ndodhet ekonomia e vendit:

– E ekspozuar para një krize që nuk ka qenë tash e dy dekada,

– E ekspozuar para inflacionit mbi 13%,

– E ekspozuar ndaj krizës energjetike,

– Mungesa e ligjit për pagën minimale,

– Rënia e prodhimit vendor, mos realizimi i projekteve kapitale nga qeveria;

Të gjitha këto janë argumente bazike që ky vendim për caktimin e koeficientit, nuk plotëson dhe nuk zgjidh problemet e gjithë atyre që janë përfitues direkt apo jo, të familjeve të tyre që preken nga ligji i pagave.

E pa arsyeshme është goditja që i bëhet sektorit të sigurisë dhe shërbyesve të tjerë.

Fatkeqësisht hap mundësinë dhe stimulon ikjen e fuqisë punëtore, në kërkim të alternativave më të mira drejt Evropës. Pra stimulon shpërnguljen e rinisë dhe zvogëlon shpresën për një jetë normale në Kosovë.