11 sportistë do ta përfaqësojnë Kosovën në Lojërat Olimpike

08 korrik 2021 | 15:16

Komiteti Olimpik i Kosovës (KOK) të enjten e ka bërë publike listën e sportistëve që do ta përfaqësojnë Kosovën në Lojërat Olimpike “Tokio 2020” të cilat fillojnë më 23 korrik dhe zhvillohen deri më 8 gusht. Për dallim prej Lojërave Olimpike “Rio 2016”, ku Kosova përfaqësohej nga tetë sportistë, tani në “Tokio 2020”, pjesëmarrës do të jenë 11 sportistë, gjashtë prej tyre femra dhe pesë meshkuj.

Të pranishëm në ceremoninë e publikimit të emrave olimpikë ishte kryetari i KOK-ut, Ismet Krasniqi, sekretari i përgjithshëm, Shasivar Haxhiaj dhe një nga sportistet që do ta përfaqësojë Kosovën në “Tokio 2020”, boksierja Donjeta Sadiku. “Po e shpallim listën e fundit të garuesve të cilët do të marrin pjesë në ‘Tokio 2020’. Gjithsej kemi 11 sportistë të cilët vijnë nga gjashtë sporte të ndryshme: xhudo, mundja, atletika, noti, boksi dhe shenjëtari sportive. Prej 11 sportistëve, gjashtë prej tyre janë femra, ndërsa pesë meshkuj. Kjo do të thotë që ende në Kosovë po dominojnë vajzat dhe po na bëjnë krenarë dhe dua t’i falënderoj. Prej kësaj liste me normë olimpike janë Majlinda Kelmendi (xhudo, kategoria -52 kg), Distria Krasniqi (xhudo, -48 kg), Nora Gjakova (xhudo, -57 kg), Loriana Kuka (xhudo, -78 kg) Akil Gjakova (xhudo, -73 kg). Të gjithë këta janë nga xhudo, kurse në mundje kemi Egzon Shalën në kategorinë -125 kg, stil i lirë. Kurse të ftuar nga komisioni trepalësh i kemi Donjeta Sadiku (boks, kategoria 57-60 kg), Drilon Ibrahimi (shenjëtari sportive, 10 metra pushkë ajrore). Të ftuar sipas vendeve të rezervuara, për shkak të universalitetit, e kemi Eda Zeqirin (not, disiplina 400 metra stil i lirë), kemi Olt Kondirollin (not, disiplina 100 metra stil i lirë), edhe Musa Hajdari (atletikë, 800 metra vrapim)”, ka thënë Ismet Krasniqi, kryetar i KOK-ut.

Ndërsa boksierja Donjeta Sadiku ka folur për synimet që ka në Lojërat Olimpike.  “Pjesëmarrja në Lojërat Olimpike për të gjithë sportistët është një ëndërr, po ashtu edhe për mua. Jam shumë krenare që e kam bërë realitet këtë ëndërr. Kam besuar gjithmonë se një ditë do t’i arriti këto suksese me punë të madhe dhe përkushtim të madh. Synimet e mia janë me marrë ndonjë medalje olimpike dhe vazhdimi deri te e arta”, ka thënë Sadiku. Ndërsa sekretari i përgjithshëm i Komitetit Olimpik të Kosovës, Shasivar Haxhijaj (KOK), tregoi se të gjithë sportistët që do ta përfaqësojnë Kosovën në “Tokio 2020”, e kanë kryer procesin e vaksinimit, duke e marrë edhe dozën e dytë të vaksinës kundër Covid-19. “Krahas këtyre përgatitjeve ne i kemi pasur edhe disa obligime të tjera që kanë të bëjnë me vaksinimin e sportisteve për të gjithë ekipin olimpik që do të udhëtojë për Lojërat Olimpike ‘Tokio 2020’. Tashmë ka përfunduar edhe pjesa e fundit, pra doza e dytë është marrë nga gjithë ekipi olimpik dhe me këtë rast dua t’i falënderoj edhe institucionet shtetërore të Kosovës të cilat u janë përgjigjur kërkesës së Komitetit Olimpik që të vaksinohet i gjithë ekipi olimpik i Kosovës”, ka deklaruar Haxhijaj.

KOK-u, po ashtu, bëri me dije se banka TEB do të jetë sponsorja më e re, duke i përkrahur në rrugëtimin e tyre drejt Lojërave Olimpike “Tokio 2020”.

Lajme të sponsorizuara

Të fundit
Kur individë ose biznese padisin shtetin e Kosovës, përkatësisht ministritë,…