Talibanët kanë vrarë të paktën tetë persona të personelit të sigurisë dhe gjashtë civilë në një sulm me bomba në provincën Ghazni të Afganistanit, kanë bërë me dije zyrtarët e qeverisë dhe talibanëve.

Zyrtarët afganë kanë thënë se bomba kishte në shënjestër njësinë kryesore të inteligjencës të vendit, Drejtorinë Kombëtare të Sigurisë (NDS).

Kurse, zyrtarët e shëndetësisë në Ghazni, kanë bërë me dije se 13 të rritur, përfshirë tetë anëtarë të NDS-së dhe një fëmijë janë vrarë.

Të paktën 60 fëmijë që ndiqnin mësimet në një shkollë private të vendosur afër sheshit të shpërthimit kanë qenë në mesin e 180 personave të plagosur.

“Shifrat e viktimave mund të rriten pasi që ky nuk është raporti i fundit i të lënduarve në shpërthimin e fuqishëm”, ka thënë Zaher Shah Nekmal, drejtor shëndetësor në provincën Ghazni.

Talibanët e kanë marrë përgjegjësinë për sulmin. “Dhjetëra oficerë të NDS-së u vranë ose u plagosën”, ka thënë zëdhënësi i grupit Zabihullah Mujahid nëpërmjet një deklarate.