Pesëmbëdhjetë ushtarë izraelitë kanë mbetur të vrarë mes luftimeve të ashpra në Gaza, gjatë operacioneve për goditjen e bazave të militantëve të Hamasit.

Humbja më e rëndë e jetës ndodhi kur një transportues i blinduar i personelit “Namer” u godit rreth mesditës të së martës nga një raketë anti-tank, duke vrarë 11 ushtarë dhe duke plagosur disa të tjerë.

Në një incident tjetër, një numër ushtarësh u vranë kur automjeti i tyre shkeli një minë. Në një tjetër incident të raportuar, dy ushtarë vdiqën kur një granatë-hedhës goditi ndërtesën në të cilën ndodheshin.

Ndërsa emrat e ushtarëve të vdekur u shpallën të mërkurën, pasi familjet ishin informuar, kryeministri i Izraelit, Benjamin Netanyahu, u zotua të vazhdojë me ofensivën tokësore në Gaza.

“Jemi në një luftë të vështirë. Do të jetë gjithashtu një luftë e gjatë. Kemi arritje të rëndësishme, por edhe humbje të dhimbshme”, tha Netanyahu në një deklaratë të lëshuar nga zyra e tij të mërkurën në mbrëmje.

Vdekjet e fundit e çojnë në 320 numrin e ushtarëve Izraelitë që janë vrarë që kur Hamasi nisi sulmin e tij të befasishëm ndaj Izraelit më 7 tetor.

Humbjet në rritje për të martën u shfaqën pjesë-pjesë pasi u zbulua se disa ushtarë të tjerë që ishin plagosur rëndë kishin vdekur nga plagët.

Pamjet e sulmeve të befasishme të Hamas ndaj ushtarëve izraelitë që kanë hyrë në Gaza janë publikuar në rrjetet sociale. Në video dallohen militantët e Hamas teksa dalin nga tunelet e nëndheshme dhe qëllojnë me raketa anti-tank automjetet e forcave izraelite.

Në një video tjetër, një grup prej mbi 10 ushtarësh izraelitë dallohen teksa qëllohen nga një granatë që lëshohet me një dron fluturues, një taktikë e ngjashme me atë të poërdorur gjerësisht në luftën e Ukrainës.