Në Akademinë e Kosovës për Siguri Publike në Vushtrri është mbajtur testi me shkrim i kandidatëve të cilët kanë kaluar testin kualifikues për prokurorë të shtetit.

Përmes një njoftimi për media nga Këshilli Prokurorial i Kosovës (KPK) është bërë me dije se në kuadër të këtij procesi rekrutues të 16 prokurorëve në prokuroritë themelore, morën pjesë 180 kandidatë, prej të cilëve 62 kandidatë i përkasin gjinisë femërore, kurse një është nga radhët e komuniteteve jo shumicë.

Sipas KPK-së, mbajtjen e testit të sotëm me shkrim e mbikëqyren anëtarët e Komisionit për Rekrutim të Këshillit Prokurorial të Kosovës, kurse për të monitoruar ketë proces ishin të pranishëm përfaqësues të Misionit për Sundimin e Ligjit në Kosovë (EULEX), Organizatës për Siguri dhe Bashkëpunim në Evropë – OSBE dhe Grupit për Studime Juridike dhe Politike  (GLPS), ndërsa për të vëzhguar ishin të pranishëm përfaqësues të Programit të Bashkimit Evropian për Sektorin e Drejtësisë në Kosovë (EUKOJUST) dhe përfaqësues të Projektit të Ambasadës Britanike në Kosovë “Forcimi i sistemit të drejtësisë në Kosovë”, përmes partnerëve implementues “Axiom International”.

Procesi i rekrutimit të prokurorëve ka filluar me shpalljen e konkursit në qershor të vitit 2020 dhe me rishpalljen e tij në maj të vitit 2021.

“Testi me shkrim për rekrutimin e prokurorëve të rinj të shtetit është pjesë e fazës së dytë të testimit të përgjithshëm, të cilin Këshilli Prokurorial i Kosovës e menaxhon sipas standardeve më të avancuara ndërkombëtare”, ka njoftuar KPK-ja.