Ministria e Infrastrukturës këto ditë në mënyrë të organizuar ka bërë kthimin e shtetasve të Kosovës të cilët kanë mbetur jashtë kufijve të shtetit e që kanë kërkuar të kthehen në Kosovë.
Për ditën e sotme është planifikuar që të kthehen 180 qytetarë në Aeroportin e Prishtinës përmes një fluturimi nga Dyseldorfi. Të gjithë të ardhurit do të vendosen në Qendrën e Studentëve e cila është kthyer në karantinë nga Qeveria e Kosovës. Aty do të qëndrojnë për 14 ditë. Njëjtë do të veprohet edhe për të ardhurit e tjerë.
Për transportin e tyre nga aeroporti deri te Qendra e Studentëve do të kujdeset Forca e Sigurisë së Kosovës.
Ministri i Infrastrukturës, Lumir Abdixhiku, ka kërkuar që të kthehen vetëm ata qytetarë që kanë urgjencë, ndërsa të tjerët ta zgjasin qëndrimin e tyre në vendet ku janë aktualisht pasi kapacitetet e Kosovës për kthimin e të gjithëve janë të mangëta. Sipas tij, ambasadat e Kosovës në të gjithë botën po u asistojnë të gjithë qytetarëve që ta zgjasin të drejtën e qëndrimit nëpër vendet respektive.
Ndryshe, nga Aeroporti i Prishtinës sot do të ketë edhe katër fluturime në nisje, dy prej tyre janë në drejtim të Dyseldorfit, një në drejtim të Munihut e një në drejtim të Cyrihut.