23 zyrtarë të Inspektoratit Policor të Kosovës (IPK) janë certifikuar të premten në Prishtinë pas përfundimit të trajnimit për “Menaxhimin e vendit të ngjarjes dhe mbledhjes së dëshmive”.

Ky trajnim u organizua nga Ambasada e ShBA-së në Kosovë/ICITAP-Departamenti i Drejtësisë së SHBA-ve, në bashkëpunim me Byronë Federale të Hetimeve (FBI).

Në ceremoninë e ndarjes së certifikatave ka marrë pjesë atasheu i programit të ICITAP-it pranë Ambasadës së ShBA-së në Kosovë, Kimberly Riffe dhe kryeshefi ekzekutiv i IPK-së, Kushtrim Hodaj.

Ky trajnim është vlerësuar i rëndësishëm në ngritjen e kapaciteteve profesionale të IPK-së, si fushë në të cilën ICITAP-i amerikan është duke kontribuuar në vazhdimësi.