Një 35-vjeçar është marrë peng në Lezhë dhe më pas është liruar nga autorët, teksa janë gjendur në presion pas kontrolleve nga policia.

Ngjarja ka ndodhur rreth orës 14:30 të kësaj të enjteje në parkimin e makinave të një lokali në rrugën Lezhë-Milot.

Policia dyshon se gjatë një konflikti fizik, tre persona kanë dhunuar dhe marrë me forcë në automjet 35-vjeçarin Dod.Gjoka.

Pasi kanë marrë njoftim, policia thotë se ka ngritur pika kontrolli në perimetrin rrethues dhe në akset lidhëse. Ndërkohë uniformat blu kanë identifikuar tre autorët, të cilët janë shpallur në kërkim.

“Menjëherë pas marrjes së njoftimit, shërbimet e Policisë së Lezhës kanë ngritur pika kontrolli në perimetrin rrethues dhe në akset lidhëse, me qëllim kapjen e autorëve, të cilët janë identifikuar nga Policia, konkretisht shtetasit K. P., B. V. dhe Xh. E., të tre banues në fshatin Tresh. Gjithashtu, u ngritën pika kontrolli në akset rrugore drejt Tiranës, Shkodër dhe Kukësit”, njoftoi policia.

Si rezultat i këtij reagimi dhe të gjendur nën presionin e kontrolleve, autorët dyshohet se e kanë zbritur nga automjeti 35-vjeçarin, i cili ndodhet aktualisht në spitalin e Lezhës dhe është jashtë rrezikut për jetën.