Kryeministri i Kosovës, Albin Kurti, ka thënë se rrënjët e shtetndërtimit burojnë nga greva e minatorëve të “Trepçës”.

Ai ka pohuar se minatorët u kthyen në vetëdije me guxim politik që dridhi gjithë ish-Jugosllavinë.

Në 35-vjetorin e grevës së minatorëve të Trepçës, Kurti ka theksuar se përmes grevës e cila zgjati tetë ditë, minatorët kërkuan të drejtat kushtetuese dhe protestuan kundër revokimit të autonomisë së Kosovës të garantuar sipas Kushtetutës së vitit 1974 të Jugosllavisë Socialiste.

“Po takohemi sot në ditën e minatorit në ditën e lavdishme në vendin tonë. 20 shkurti i vitit ’99 ishte ditë e madhe e asaj pranvere. Menjëherë pas ditës së pavarësisë, ne nderojmë rrënjët e shtetit tonë. Minatorët porositën qartë se populli ynë nuk heq dorë për të vendosur për veten. Më 20 shkurt të vitit 1989, minatorët u ngujuan për heqjen e autonomisë. Fjala ‘Trepçë’ mori një kuptim të fuqishëm dhe politik, dhe kjo vazhdoi në ditën e fundit. Kështu një komuniteti minatorësh u kthye në vetëdije me guxim politik që dridhi gjithë ish-Jugosllavinë”, ka thënë Kurti, raporton Ekonomia Online.

Ai tregoi edhe për investime që është duke i bërë Qeveria në “Trepçë”, të cilën e quajti “pasuri tonën”.

“Në gjendje jo të mirë shëndetësore qëndruan mbyllur nëntokë. Minatorët tanë nuk u dorëzuan para të keqes me vendosmërinë e tyre. U përkulemi në nderim përjetë e mot. Në minierë puna jonë është e rëndë por misioni është i mundshëm. Trepçën sot e mbajmë si pasuri tonën duke i qeverisur mirë dhe duke ua rritur vlerën. Suksesi ynë është i mundshëm bashkë si Qeveri dhe me përkushtimin tuaj”, është shprehur Kurti.

Kryeshefi i ndërmarrjes “Trepça”, Bashkim Kurti, ka folur për historikun e kësaj ndërmarrje, duke theksuar se daton që nga vetë ekzistimi i Kosovës, për çka kërkoi të jenë unifikues kur bëhet fjalë për Trepçën.

“Jemi mbledhur sot këtu për të kujtuar grevën e vitit 1989. Minatori i Trepçës dje sot vazhdon të dëshmojë për daljen nga sfidat dhe për të na bërë krenar. Trepça që nga fillet e saj që nga koha romake ka vendosur themelet e saj dhe ka kaluar në vështirësi. Në këtë rast nuk mund të mos i përmendim shfrytëzimin abuzimet që i janë bërë Trepçës që janë plagë të paharruara. Historiku i Trepçës, minatori është guri i pathyer si gurët e Trepçës. Kjo reflekton nga vetë qytetarët që u lindën dhe rriten. Sot në 35-vjetorin të kujtojmë për të mos harruar kurrë djersën mundin për të ndërtuar shtetin tonë. Festojmë qëndresën përkushtimin për zanatin e tyre, shikojmë nga e ardhmja. Mbetet një dëshmi e përpjekjeve tona, Trepça është e vjetër aq sa vendi ynë, të qëndrojmë të bashkuar për Trepçën”, ka thënë ai.

E zëvendësministri i Ekonomisë, Getoar Mjeku, ka theksuar se janë në proces të rekrutimit të punëtorëve dhe në hapjen e rrugës për investime të mëdha. “Ne jemi të përkushtuar ta ruajmë Trepçën sepse është e jona. Trepça është e vetmja që ka një aksionar të dytë. Ndërmarrja po i kthehet minatorit dhe po punon në shtimin e numrit të tyre. Sa më shumë rekrutime të reja. Ndërmarrja po hap rrugën e investimeve të mëdha”, ka deklaruar Mjeku.

Nënkryetari i komunës së Mitrovicës, Arian Tahiri, ka thënë se pikërisht minatorët u bën motivues të spektrit politik të atëhershëm. Ai kërkoi kushte më të mira të punës për kolegët e tij.

“Është një ditë shumë e rëndësishme jo vetëm për Trepçën por për gjithë popullin shqiptar. Sot kujtojmë 35-vjetorin e ngjalljes e motivit. Ishin pikërisht minatorët ata të cilët e motivuan spektrin politik e më pas u rreshtuan krahë UÇK-së duke krijuar fuqinë e madhe. Minatorët kanë nevojë të avancohen me kushte të punës”, ka thënë ai.