Kryetari i Lidhjes Demokratike të Kosovës (LDK), Lumir Abdixhiku dhe zyrtarë të tjerë të partisë kanë bërë homazhe te varri i presidentit historik, Ibrahim Rugova, në përvjetorin e 35 të themelimit të LDK-së.

Abdixhiku ka  kujtuar 23 dhjetorin e vitit 1989, datë kjo kur intelektual të shquar të kohës nisën lëvizjen më të madhe kombëtare për liri, pavarësi e demokraci.

“Sot nderojmë dhe kujtojmë 23 dhjetorin e vitit 1989 datën që 35 vite më parë intelektual të shquar të kohës nisën lëvizjen më të madhe kombëtarë për liri, pavarësi e demokraci. Themeluan Lidhja Demokratike të Kosovës dhe në krye të saj u vendos arkitekti i vet Kosovës presidenti historik Ibrahim Rugova te i cilin sot i bëmë nderime”, ka thënë Abdixhiku.

Ai ka thënë se Kosova ka nevojë të rikujtoj momentet historike që të bëhen bashkë dhe të krijohen momentume të reja, raporton “EO”.

“35 vite më pas ne pasardhësit politik të Rugovizmit kujtojmë të tri dekadat e gjysmë të veprimit të madh politik të kësaj lëvizje të madhe shqiptare e kombëtare dhe nderojmë të gjitha figurat në këtë shtëpi të madhe. Rikujtojmë nevojën që momentet historike të bëhen bashkë dhe të krijojnë momentume të reja. Ky momentum i ri na vjen me zgjedhjet e reja 9 të shkurtit”, ka thënë Abdixhiku.