Klinika e Oftalmologjisë (Syve), pas 37 vjetëve pa investime, këtë vit është pajisur me pajisje moderne në vlerë 350 mijë euro, investim i Shërbimit Spitalor dhe Klinik Universitar të Kosovës dhe Ministrisë së Shëndetësisë.

Këto pajisje e kanë e shndërruar këtë klinikë, në klinikë moderne dhe kanë mundësuar rritjen e gamës së shërbimeve shëndetësore.

Me rastin e pranimit të këtyre pajisjeve, këtë klinikë e kanë vizituar ministri i Shëndetësisë, Uran Ismaili, dhe drejtori i përgjithshëm i SHSKUK-së, dr. Basri Sejdiu.

Ata nga afër kanë parë punën që po bën stafi shëndetësor në sallat operative, pas furnizimi me pajisje të reja mjekësore, e që janë lehtësim për punën e tyre dhe krijojnë kushte më të mira për trajtim të pacientëve.

Ministri i Shëndetësisë, Uran Ismaili, ka thënë se furnizimi i kësaj klinike me aparaturën e nevojshme i rrit kapacitetet e saj për diagnostikimin dhe operimin e sëmundjeve të syve.

Ai rikujtoi se deri me blerjen e këtyre pajisjeve, vetëm për oftalmologji, nga Fondi i Sigurimeve Shëndetësore, ishin shpenzuar mbi 1 milion euro në vit, meqë deri sot janë trajtuar jashtë institucioneve publike shëndetësore.

Tani, këto shërbime pacientët do të nisin t’i marrin edhe në QKUK.

Ministri Ismaili mes tjerash ka bërë me dije se me këtë investim po bëhet transformimi i kësaj klinike, pasi që deri tani ishte një klinikë, e cila për shumë vjet ka varfëruar xhepin e qytetarëve dhe buxhetin e shtetit.

Drejtori i ShSKUK-së, Basri Sejdiu, me këtë rast, ka thënë se këto investime janë duke bërë në vazhdën e investimeve që po bëhen në institucionet shëndetësore, në varësi të SHSKUK-së, me qëllim të ofrimit sa më të mirë të shërbimeve shëndetësore për pacientët.

“Jemi duke investuar në aspektin bazik në infrastrukturë dhe shumë pajisje mjekësore që kanë munguar prej që ekziston kjo klinikë. Kjo mundëson metoda të reja kirurgjike dhe edukim për stafin dhe pacientët që të mos shkojnë jashtë klinike”, ka thënë Sejdiu.

Drejtori i Klinikës së Oftamologjisë, Adem Miftari, ka theksuar se nga viti 1982 nuk ishte investuar në këtë klinikë. Duke shprehur falënderimin për investimin e bërë, ai ka premtuar se tash e tutje, me ardhjen e pajisjeve të reja, nuk do të ketë më nevojë për t’i dërguar pacientët jashtë klinikës, sepse shumica e shërbimeve, si diagnostike ashtu edhe terapeutike, do të kryhen në Oftamologji.

/Epoka e re/