Ministrja e Industrisë, Ndërmarrësisë dhe Tregtisë (MINT) ka nënshkruar marrëveshjet për skemën e granteve për certifikimin e produkteve dhe atë të Iniciativës për Fuqizim Digjital.

Ministrja e kësaj ministrie, Rozeta Hajdari, ka bërë me dije se nga të dy skemat, kanë përfituar 39 ndërmarrje ndërsa planifikohet të përfitojnë edhe 90 të tjera në të ardhmen.

Hajdari ka thënë se krijimi i ambientit për të bërit biznes të drejt, konkurrues dhe të adaptueshëm është synim afatgjatë i ministrisë. Ajo ka theksuar se MINT-i ka hartuar edhe politikën industriale për shtatë sektorë prodhues, të cilët i ka cilësuar “yje në rritje” për zhvillimin e zinxhirit global të blerjes.

“Skema këto të përkrahura nga MINT-i, përmes Agjencisë për Investime dhe përkrahje e ndërmarrjeve dhe përkatësisht Iniciativës për Fuqizim Digjital që është në kuadër të projektit me mbështetje financiare nga Agjencia Austriake për Zhvillim dhe Bashkëpunim. Krijimi i ambientit për të bërit biznes të drejt, konkurrues dhe të adaptueshëm është synim afatgjatë i ministrisë”, ka thënë Hajdari, duke shtuar se transformimi strukturor është dinamika kyçe që shtyn rritjen ekonomike të shpejt. “Prandaj në funksion të politikave industriale, tregtare, të ndërrmarrësisë jemi duke zhvilluar sa më shumë instrumente dhe skema mbështetëse. Për herë të parë në Kosovë MINT ka hartuar politikën industriale me vizion të qartë deri në vitin 2030, janë shtatë sektor prodhues, përpunues që janë si yje në rritje për të zhvilluar në zinxhirin global të blerjes. Politika industriale 2030 ka për qëllim transformimin infrastrukturor të industrisë vendore në një industri me të integruar globale që është në gjendje të prodhojë produktet me vlerë të lartë të shtuar dhe të shtojë punësim të denjë për të rinjtë tanë”, ka thënë Hajdari.

Ajo ka thënë se bizneset përfituese të certifikimin e produkteve në kuadër të shtatë sektorëve të strategjisë për zhvillim industrial dhe mbështetje të biznesit synojnë të kontribuojnë në rritje e prodhimit dhe përpunimit, përmirësimin e bilancit tregtar nëpërmjet eksporteve të larta. “Përmes skemës së certifikimit të produkteve kanë përfituar 6 ndërmarrje të cilat do të nënshkruajnë marrëveshjen sot, planifikojmë përkrahjen edhe të 20 ndërmarrjeve. Në kuadër të projektit për Fuqizim Digjital, ku MINT-i përmes agjencisë KIESA-s, kanë përfituar 33 ndërmarrje për shërbime digjitale në vendin tonë. Planifikojmë të përkrahim edhe 70 ndërmarrje të tjera”, ka thënë Hajdari.