Kryetari i Federatës së Basketbollit të Kosovës (FBK), Arben Fetahu dhe sekretarja e përgjithshme e FBK-së, Elvira Dushku, kanë pritur përfaqësuesit e klubit 3×3 Prishtina, Fikret Shatrin dhe Fisnik Junikun.

Temë e diskutimit të tyre kanë qenë aktivitetet e klubit 3×3 Prishtina gjatë muajit gusht dhe kërkesa për mbështetje nga FBK-ja për këtë aktivitet si dhe kërkesa nga 3×3 Prishtina për bashkorganizimin e aktiviteteve në të ardhmen për lojën 3×3, me theks të veçantë në konkurrencën e femrave.

Në mesin e muajit prill, FIBA ka dërguar dy donacione për Federatën e Basketbollit të Kosovës (FBK). Bëhet fjalë për terrenin e lojës 3×3, semaforin 3×3, topat 3×3, topat e Mini-Basketbollit dhe topat për vajza. FIBA në fund të vitit pati vendosur ta shpërblejë FBK-në për punën e shkëlqyeshme që kjo e fundit e ka bërë gjatë vitit 2019 për zhvillimin e basketbollit ndër të rinj në Kosovë. Në fakt, ka qenë FIBA Evropa që e ka nominuar FBK-në në mesin e dy Federatave Nacionale të Evropës për të qenë fituese e 350 topave Molten (të madhësisë 4, 5 dhe 3×3) për ta inkurajuar FBK-në që ta vazhdojë punën e shkëlqyer që po e bën, veçanërisht me të rinjtë. Loja 3×3 përkrahet nga FIBA dhe, për këtë arsye, Federata e Basketbollit e Kosovës do ta mbështetë çdo aktivitetet të masivizimit të kësaj loje.

“Drejtuesit e FBK-së ishin pro kërkesave të përfaqësuesve të 3×3 Prishtina dhe premtuan se do të bëjnë çmos për të masivizuar këtë lojë në Kosovë. Kjo lojë është atraktive për të rinjtë dhe gjatë kësaj vere pritet të organizohen disa aktivitete, duke marrë parasysh se zhvillohen në ambiente të hapura dhe është më lehtë për shkak të pandemisë COVID-19, ku janë anuluar shumë aktivitete sportive në mbarë botën”, thuhet në njoftimin e FBK-së.

(V.Z / Epoka e re)