Numri i të vdekurve nga shembja e autostradës në Kinën juglindore është rritur në 48 të enjten, ndërsa kërkuesit kanë gërmuar për të dytën ditë nëpër një zonë të vështirë dhe malore.

Njëra anë e autostradës me katër korsi në qytetin Meizhou u shemb rreth orës 2 të mëngjesit të së mërkurës pas një muaji shirash të dendur në provincën Guangdong.

Njëzet e tre automjete ranë në një shpat të pjerrët, disa nga të cilat morën flakë. Vinçat e ndërtimit janë përdorur për të hequr automjetet e djegura dhe të shkatërruara, raporton “AP”.

Zyrtarët në Meizhou kanë thënë se tre persona të tjerë ishin të paidentifikuar, në pritje të testit të ADN-së. Nuk ishte menjëherë e qartë nëse ata kishin vdekur, gjë që do ta çonte numrin e të vdekurve në 51.

30 persona të tjerë kishin lëndime jo të rrezikshme për jetën.

Kërkimi ishte ende në vazhdim, ka thënë kryebashkiaku i qytetit Meizhou, Wang Hui, në një konferencë shtypi në orët e vona të pasdites. Asnjë i huaj nuk është gjetur në mesin e viktimave, tha ai.

Puna e kërkimit është penguar nga shiu dhe toka dhe zhavorri që rrëshqasin poshtë shpatit.

“Për shkak se disa nga automjetet e përfshira morën flakë, vështirësia e operacionit të shpëtimit është rritur”, ka thënë Wen Yongdeng, sekretari i Partisë Komuniste për zyrën e menaxhimit të emergjencave në Meizhou.

“Shumica e automjeteve u groposën në tokë gjatë shembjes, me një vëllim të madh dheu që i mbuloi”, ka thënë ai.

Yongdeng ka theksuar se reshjet e dendura të zgjatura kanë ngopur tokën në zonë, “duke e bërë atë të prirur ndaj fatkeqësive dytësore gjatë procesit të shpëtimit”.

Udhëheqësi kinez, Xi Jinping, ka thënë se të gjitha rajonet e Kinës duhet të përmirësojnë monitorimin dhe masat e paralajmërimit të hershëm dhe të hetojnë çdo rrezik për të garantuar sigurinë e publikut dhe stabilitetin social, tha transmetuesi shtetëror CCTV.