Që nga vitit 2012, kur edhe për herë të parë janë regjistruar rastet e para të bashkëngjitjes së konfliktit në Siri dhe Irak, janë vrarë 76 kosovarë.

Në mesin e vitit 2012 janë regjistruar rastet e para të shkuarjes së kosovarëve në zonën e konfliktit në Siri dhe më pastaj në Irak.

Policia e Kosovës ka bërë të ditur se që nga ajo kohë e deri më tani janë 253 persona të gjinisë mashkullore që iu kanë bashkëngjitur ISIS-it. “Që nga viti 2012 e deri më tani janë 253 persona të gjinisë mashkullore që në periudha të ndryshme kanë udhëtuar për në zonën e konfliktit dhe të cilët trajtohen si luftëtarë të huaj terroristë”, thuhet në përgjigjen e Policisë së Kosovës.

Sipas të dhënave të Policisë së Kosovës, në zonën e konfliktit këtyre personave iu kanë bashkuar edhe gratë dhe fëmijët. “Këtyre “luftëtarëve” iu kanë bashkëngjitur familjarë të tyre, në zonën e konfliktit, duke përfshirë: 51 gra dhe 52 fëmijë”, bën të ditur policia.

Edhe pas shtatë vitesh, kosovarët përsëri vazhdojnë të jenë prezent në këto zona.

Momentalisht sipas të dhënave në zonën e konfliktit janë 44 gra, 48 fëmijë 60 fëmijë tjerë të lindur në zonën e konfliktit “Aktualisht në zonën e konfliktit gjenden 44 gra, 48 fëmijë dhe 60 fëmijë tjerë të lindur në zonën e konfliktit, së paku nga njëri prind me shtetësi apo me prejardhje nga Kosova”, thuhet në përgjigjen e policisë.

Që nga viti 2012 e deri më tani, në Kosovë janë kthyer gjithsej 132 persona të cilët iu kishin bashkëngjitur këtij konflikti, e në mesin e tyre janë gjashtë gra dhe gjashtë fëmijë. “Numri i personave të kthyer në Kosovë apo edhe në vendet tjera prej nga kanë udhëtuar është 132, përfshirë këtu 120 meshkuj, 6 gra dhe 6 fëmijë”, ka bërë të ditur policia.

Në tërë këtë periudhë kohore, 76 meshkuj nga Kosova janë vrarë në zonën e konfliktit në Siri dhe Irak.
“Numri i personave të vdekur në zonën e konfliktit është 79 persona, prej të cilëve 76 persona të gjinisë mashkullore të vrarë, ndërsa 3 persona, përfshirë këtu një person i gjinisë mashkullore, një person i gjinisë femërore dhe një fëmijë i lindur në zonën e konfliktit raportohet të kenë vdekur nga shkaqe natyrore”, ka bërë të ditur Policia për “lajmi.net”.

Po ashtu, gjatë këtyre viteve ka pasur edhe persona të arrestuar. Sipas Policisë së Kosovës, që nga viti 2013 në luftën kundër terrorizmit e deri në vitin 2018, janë arrestuar gjithsej 155 persona.
Më së shumti të arrestuar ka pasur në vitin 2014, ku policia kishte arritur t’i arrestonte 81 persona.

Ndërkaq në tërë vitin që e lamë pas, pra në vitin 2018, Policia e Kosovës ka arrestuar tetë persona.

Ndryshe rasti më i fundit i vrasjes së kosovarëve në zonën e konfliktit është shënuar më 5 mars të këtij viti, ku një grua nga fshati Karaçevë i Kamenicës. 30-vjeçarja nga ky fshat, Filloreta Kastrati në zonën e konfliktit kishte shkuar së bashku me bashkëshortin dhe dy fëmijët e saj, por që bashkëshortin ia kishin vrarë kohë më parë në këtë konflikt lufte.
Ndërkaq tani dy vajzat e saj, kanë mbetur pa asnjërin prind në zonat e rrezikshme të Sirisë.