Anëtarët e Komisionit për Integrime Evropiane të Kuvendit të Kosovës kanë takuar delegacionin e Komisionit për Çështje Ligjore dhe Mbrojtjen e Konsumatorit të Bundestagu gjerman, i cili po qëndron për vizitë në Kosovë.

Sipas njoftimit, anëtarët e këtij komisioni kanë falënderuar deputetët e Bundestagut për mbështetjen e dhënë nga shteti gjerman ndaj Kosovës, si dhe kanë shprehur përkushtimin e tyre në procesin e integrimit evropian të Kosovës.

“Në këtë takim është diskutuar për perspektivën evropiane të Kosovës dhe angazhimin e institucioneve të Kosovës për sundimin e ligjit dhe reformat në drejtësi”, është thënë në njoftimin e këtij komisioni që drejtohet nga deputetja Blerta Deliu-Kodra.

Gjithashtu në këtë takim është diskutuar edhe rreth procesit të liberalizimit të vizave për qytetarët e Kosovës.

/Epoka e re/