Në ndërmarrjen komunale “Stacioni i Autobusëve” në Gjilan është bërë hapja e zyrës për prezencën e policisë, me qëllim të rritjes së sigurisë publike, kujdesit ndaj udhëtarëve dhe operatorëve.

I pari i kësaj komune, Lutfi Haziri, ka apeluar te të gjithë operatorët që të jenë vigjilent dhe të zbatojnë ligjin dhe rregullat e komunikacionit.

Haziri ka konfirmuar se në ndërmarrjen publike “Stacioni i Autobusëve”, do të vazhdohet me investime dhe njëkohësisht tha se pret certifikimin e stacionit sipas udhëzimeve ligjore.

“Investimet kanë të bëjnë me infrastrukturën e terrenit dhe objektit në mënyrë që të gjitha llojet e transporteve që kërkohen të jenë të koordinuara edhe me stacionet tjera. Gjithashtu, PK-ja do të ndërmarrë masat e nevojshme dhe nuk do të ketë as ndalje apo parkim të paautorizuar në territorin e komunës së Gjilanit, në mënyrë që stacioni të jetë në funksion të mbarëvajtjes së detyrave të veta ligjore që ka”, ka thënë Haziri.