Ende pa nisur zyrtarisht fushata për zgjedhjet për institucionet e BE-së, politikanët në Evropë kanë nisur aktivitetet e tyre.

Veçmas politikanët që vijnë nga partitë e mëdha gjermane CDU dhe CSU janë në vlugun e aktiviteteve për të marrë votat.
Madje në Gjermani ata po kërkojnë edhe votat e shqiptarëve që jetojnë në këtë vend.

Njëri prej tyre është politikani me ndikim që shërben në Parlamentin Evropian që nga viti 1994 nga radhët e CSU, Markus Ferber dhe kolegu tjetër nga kjo parti, Mathias Fink.

Të dy ata u shfaqën në restorantet e një shqiptari nga Kosova, ndërmarrësi Ilir Seferi nga Augsburg të Bayernit.
E veçanta e kësaj ngjarje ishte pjesëmarrja e zëvendëskryeministrit të Kosovës, Enver Hoxhaj i cili së bashku me miqtë e tij gatuajnë në një kuzhinë për mysafirët e pranishëm në restorant.

Hoxhaj për mediat ka thënë se qëllimi “ i pjesëmarrjes së tij ishte për të mbështetur miqtë në garën për Parlamentin Evropian të cilët do ta përkrahin Kosovën në të ardhmen për marrjen e vizave apo agjendën evropiane. Edhe menu e ushqimit ishte një kombinim kosovaro-gjerman ashtu sikurse ishin edhe pjesëmarrësit në përkrahje të kandidatëve për deputetë”.

“Një Evropë e fortë është me rëndësi edhe për Kosovën dhe kjo mund të arrihet me sa më shumë deputetë nga partitë tradicionale evropiane që janë mbështetëse të shqiptarëve dhe Kosovës” ka thënë Hoxhaj.

Eurodeputeti Markus Ferber në vitin e kaluar në votimet për vizat për Kosovën në Parlamentin Evropian kishte votuar kundër kurse në votimin e para dy ditëve të sërishëm në Parlament vota e tij ishte për. Ai është i treti në listën e CSU për PE ku bartës është politikani i njohur Manfred Webber, aktualisht udhëheqës i grupit të partive popullore (EPP) dhe me shumë mundësi për të qenë një nga Komisionerët e ardhshëm të BE-së./Telegrafi