Policia e Kosovës ka bërë me dije se ka arretsuar një të dyshuar për falsifikimin e certifikatave të veteranëve të UÇK-së.

“Me datë 06.02.2019, policia ka pranuar një informatë lidhur me disa persona të cilët dyshohej se i kanë falsifikuar certifikatat e statusit të veteranit të UÇK-së, me arsyetimin se kanë qenë ushtarë të UÇK-së”

“Rasti është Iniciuar në Drejtorinë për Hetimin e Krimit Ekonomik dhe Korrupsionit (DHKEK) për dyshim të bazuar për Veprën Penale ‘Falsifikim i Dokumentit’ dhe ‘Mashtrim’, lëndë e cila është trajtuar dhe vazhdon të trajtohet nga Njësia Rajonale për Hetimin e Krimeve Ekonomike dhe Korrupsion në Prishtinë. Në lidhje me rastin me datë 14.03.2019 janë arrestuar tre persona, ndërsa në bazë të autorizimit ligjor është kërkuar që të zhvillohen veprime të mëtutjeshme hetimore”.

“Me datë 08.04.2019, pas hetimeve profesionale nga Policia e Kosovës është intervistuar një person i dyshuar me inicialet (L.D.) dhe me Aktvendim të Prokurorit i njëjti dërgohet në ndalim për 48 orë, për Veprat penale ‘Falsifikim i dokumenteve’ e sanksionuar nga Neni 398 dhe ‘Mashtrim’ e sanksionuar nga Neni 335 i KPRKS-së”, ka njoftuar Policia e Kosovës.

Sipas këtij njoftimi, Policia e Kosovës është duke ndërmarr veprime hetimore në vazhdimësi, sepse ekziston dyshim i arsyeshëm se mund të ketë edhe persona tjerë të përfshirë në këtë rast.

/Epokae re/