Me rastin e festës së Fitër Bajramit, kryeministri Ramush Haradinaj ka vizituar Bashkësinë Islame të Kosovës (BIK).

Ai përmes një postimi në llogarinë e vet në “Facebook”, ka shkruar se detyrë e pashmangshme e institucioneve është që të gjithë qytetarëve t’ua mundësojë lirinë e besimit, si një e drejtë me kushtetutë e ligj dhe zbatimin e besimit në bazë të bindjeve të tyre.

Postimi i plotë i Haradinajt:

Të gjithë besimtarëve myslimanë, urime festa e Fitër Bajramit. Sot, pata nderin që të uroj myftiun Naim Tërnava dhe gjithë BIK-un për këtë festë të paqes, harmonisë e tolerancës mes vete.

Në këtë festë që i bën bashkë familjet dhe përçon mesazhin e dashurisë dhe solidaritetit, uroj që shqiptarët kudo nëpër botë t’i bashkojë atdhedashuria, si një vlerë kulmore e jona!

Detyrë e pashmangshme e institucioneve tona është që të gjithë qytetarëve t’ua mundësojë lirinë e besimit, si një e drejtë me kushtetutë e ligj dhe zbatimin e besimit në bazë të bindjeve të tyre!

RH