Derisa disa aktorë dhe qytetarë të mbështetur nga Partia Demokratike vazhdojnë rezistencën brenda Teatrit Kombëtar për të mos lejuar shembjen e godinës, kryeministri shqiptar Edi Rama ka vijuar të sjellë argumente të artistëve që janë shprehur publikisht pro shembjes së Teatrit Kombëtar .

Rama ka publikuar në profilin e tij në “Facebook” mendimin e regjisorit të njohur Altin Basha për çështjen e teatrit. “Regjisori Altin Basha, një ndër emrat më të spikatur të gjeneratës së re të krijuesve të skenës, mbështet njësoj si shumica dërrmuese e komunitetit teatror shqiptar, ndërtimin e Teatrit të Ri Kombëtar dhe shembjen e gërmadhës ekzistuese.”, ka shkruar Rama.

Postimin e tij, kreu i qeverisë e ka shoqëruar më një shprehje të regjisorit Basha.

“Qartë dhe shqip, unë mendoj se duhet një godinë e re. Pjesa muzeale mund të zgjidhet brenda godinës së re. Si regjisor, po ju deklaroj me përgjegjësi, se ajo godinë nuk ofron mundësinë për zhvillimin e një krijimtarie cilësore teatrore dhe, për rrjedhim, një cilësi të ulët produkti për spektatorët dhe qytetarët.”, ka përfunduar postimin e tij kryeministri Rama.