Haradinaj kujton Shaban Shalën: Ishte personazh i epokave më të ndritura të historisë së Kosovës
Kryeministri në detyrë, Ramush Haradinaj, ka kujtuar gjeneralin Shaban Shala në tetëvjetorin e rënies së tij.
“Shaban Shala ishte personazh i epokave më të ndritura të historisë së Kosovës. Para luftës ishte në organizimet atdhetare qe i paraprinë themelimit të UÇK-së, ndërsa në luftë u shqua si organizator dhe prijës i saj”, ka shkruar Haradinaj në llogarinë e vet në “Facebook”.
“I ndershëm, besnik dhe patriot i vërtetë, do vazhdonte kontributin e tij në ndërtimin e vendit, me theks të veçantë themelimin e zhvillimin e TMK-së dhe FSK-së. 8 vite më parë, ai iu bashkua të vëllait dëshmor Bedriut e shumë bashkëluftetarëve të tjerë, duke lënë zbrazëtirë të madhe në proceset shtetndërtuese, por duke mbetur përgjithmonë në kujtesën historike. Lum Atdheu që kishte burra si ai”, ka shkruar Haradinaj.