Kryetarja e Kuvendit të Republikës së Kosovës, Vjosa Osmani, vizitën e parë jashtë ambienteve të Kuvendit, në cilësi të kryeparlamentares, e ka realizuar në Klinikën e Neonatologjisë në ShSKUK.

Gjatë qëndrimit në këtë klinikë, kryeparlamentarja Osmani, ka vizituar ambientet e brendshme të klinikës dhe ka takuar pacientët dhe punëtorët shëndetësorë.

Kryetarja Osmani ka thënë se ka dëshiruar që vizitën e parë ta realizojë pikërisht në vendin ku fillon jeta, pra në Klinikën e Neonatologjisë, duke përcjellë kështu një mesazh dhe simbolikë të veçantë.

Ajo ka theksuar se do të punojë për të bërë të pamundurën që shëndetësia të bëhet prioritet i Qeverisë.

“Falënderoj të gjithë doktorët e infermierët që bëjnë të pamundurën për fëmijët. Kam ardhur në vizitën e parë aty ku fillon jeta, për të treguar se prioritetet dhe realizimi i tyre i takon qeverisë, por ne si Kuvend do të bëjmë të pamundurën që shëndetësia të jetë prioritet”, ka thënë kryeparlamentarja Osmani, duke shtuar se në qoftë se nuk ndërtohen politika shëndetësore të mirëfillta, atëherë nuk mund të ketë as shtet.

“Neonatologjia është vendi ku unë i kam lindur dy vajzat. Pasi të fillojë ndërtimi i Klinikës së re, do të ketë kushte më të mira. Edhe sot ka mungesa, por ne duhet të punojmë që këto kushte të përmirësohen”, ka thënë Osmani.

Kryeparlamentarja Osman, gjatë kësaj vizite ka folur edhe për Ligjin për pagat, duke shtuar se punëtorët shëndetësorë meritojnë paga më të larta, pavarësisht ligjit.

/Epoka e re/