Drejtori i Institutit Kombëtar të Shëndetit Publik, Naser Ramadani, u ka bërë thirrje prapë qytetarëve t’i respektojnë rekomandimet edhe në javët në vijim në mënyrë që pandemia COVID 19 të kalojë me pasoja sa më të vogla. Ramadani në emisionin “Zyra e Ankesave” në “RTV Dukagjini” tha se lufta më e madhe kundër koronavirusit mund të bëhet nga qytetarët e jo në spital.

“Lufta më e madhe nuk është në spital, por te çdo individ i Republikës së Kosovës. Fatmirësia më e madhe e kësaj sëmundje është se mund ta ndihmojmë popullatën nëse na dëgjon dhe është koha vendimtare që të na dëgjojë. Po ju lutem të qëndrojmë të distancuar, ta mbajmë higjienën, të mos përzihemi sepse është momenti i krizës 10 ditëshe ose dy javë, kur virusi është në mesin tonë në mënyrë individuale dhe nuk e dimë se kush mund ta ketë”, tha Ramadani.

Drejtori i Institutit tha se aktualisht Kosova është në skenarin e butë sepse rastet janë individuale dhe nuk ka raste grupore të shpërthimit. “Ta mbajmë distancën në mënyrë që virusi të mos shkojë prej njërit person te tjetri, se ai zhduket pastaj”, tha Ramadani, duke shtuar se është apeli i tij i fundit para shpërthimit të rasteve nëse nuk iu përmbahemi rekomandimeve. Sipas tij, është vërtetuar se ky virus nuk mund të përhapet më shumë se dy metra në ajër. “Ne do ta kalojmë sëmundjen, nuk do të zhdukemi, por dëshirojmë që kjo pandemi të kalojë me pasoja minimale”, tha ai.

Ai bëri me dije se ka pasur kërkesa për dalje nga karantina dhe intervenca të llojeve të ndryshme por, sipas tij, nëse nuk iu përmbahemi rekomandimeve dhe masave të qeverisë, atëherë nuk do të jetë puna mirë, transmeton Telegrafi. Sipas tij, është e pamundur që secili rast të përcillet kur nuk ndalen darkat e nuk mbahet distanca e rekomanduar.

Duke sqaruar rreth virusit COVID 19, ai tha se çështja është se askush prej epidemiologëve nuk e ka të qartën situatën epidemiologjike me këtë virus.

“Është një virus enigmatik. Kemi mësuar karakteristikat e tij, e të cilat dallojnë nga një vend në tjetrin”, tha ai. Sipas tij, në bazë të përvojës është mësuar se periudha e inkubacionit është 1 deri në 14, por nuk do të thotë se është fikse, ka raste edhe 24 ditë.

“Shkenca merr shumicën e rasteve si konstatim. Shumicën e rasteve janë paraqitur shenjat klinike nga 5-7 ditë”, tha ai.

Ramadani njoftoi se në Kosovë masat kundër koronavirusit kanë filluar të ndërmerren prej 1 janarit 2020. “Para 2 muajve kemi rekomanduar distancën prej 2 metra, vetizolimin, higjienën personale”, tha ai, duke shtuar se është vërtetuar se virusi nuk mund të përhapet më shumë se dy metra në ajër.