Rastet e të infektuarve me koronavirus në Amerikën Jugore po shtohen. Në kohën kur verës në hemisferën jugore po i vjen fundi, rënia e temperaturave ka mundësi që ta rëndojë gjendjen e përhapjes së pandemisë në Brazil dhe në shtetet e tjera të këtij kontinenti, thonë ekspertët mjekësorë. Megjithatë, ende pak dihet në lidhje me atë se si ndryshimi i stinëve ndikon te virusi COVID 19. Por, gjashtë ekspertë të sëmundjeve ngjitëse në Brazil thanë se epidemitë e kaluara, përfshirë gripin e derrave, bëhen më të rënda në temperatura të ulëta.

Brazili tashmë është shteti më i prekur nga koronavirusi në Amerikën Latine me më shumë se 900 raste të infektimeve dhe së paku 11 të vdekur.

Ndonëse pjesa më e madhe e vendit karakterizohet me klimë tropikale, temperatura në jug dhe juglindje sillet rreth 5 gradë në qershor dhe korrik. Moti fillon të ftohet në prill, kur pritet edhe rritja e numrit të infektimeve, thanë ekspertët. “Nuk ekziston ndonjë moment i mirë për ardhjen e koronavirusit, por ky nuk është një moment i mirë”, tha Marida da Gloria Teixeira, epidemiologe në një universitet shtetëror.

Këtë shqetësim po e ndajnë edhe vendet e tjera të hemisferës jugore. Australia e ka një numër të përafërt të infektimeve me Brazilin, por autoritetet atje kanë thënë se presin që shifra të rritet me ardhjen e dimrit.