Sipas ekspertëve, të rinjtë kanë më shumë të ngjarë ta humbin ndjesinë e të shijuarit kur preken nga koronavirusi.

Zyrtarët shëndetësorë këshillojnë qytetarët që të kontrollojnë simptoma, si: temperatura e lartë, lodhja apo kolli i thatë. Megjithatë, ekspertët e veshëve, hundës dhe fytit besojnë se këto simptoma mund të jenë më pak të vërejtura tek pacientët e rinj, shkruan mediumi britanik “Metro”.

Profesori Nirmal Kumar, kreu i ENT UK, një shoqatë që përfaqëson operacionet e veshit, hundës dhe fytit në Mbretërinë e Bashkuar, tha se humbja e ndjesisë së nuhatjes (anosmia) dhe shijes mund të jenë një simptomë për ‘bartësit e fshehur’ të Covid-19.

“Tek pacientët e rinj në moshë nuk ka ndonjë simptomë të zakonshme sikurse janë kolla dhe temperatura. Ata mund të pësojnë humbje të ndjesisë së nuhatjes dhe të shijes. Kjo bën të kuptohet se viruset po fillojnë të vendosen në hundë”, tha Kumar për “Sky News”.

Në Gjermani, dy nga tre raste të koronavirusit shoqëroheshin me simptomat e humbjes së ndjesisë së nuhaturit, shtoi tutje kreu i shoqatës.

Deri më tani janë shfaqur më se 730 mijë raste me virusin pandemik në botë dhe më shumë se 33 mijë kanë vdekur si pasojë.