Ambasadori norvegjez, i kënaqur me punën e Ministrisë së Shëndetësisë

06 prill 2020 | 13:33

Ministri në detyrë i Shëndetësisë (MSh), Arben Vitia, ka pritur në takim ambasadorin e Norvegjisë në Kosovë, Jens Erik Grandahl, me të cilin ka biseduar për situatën pandemike Covid-19.

Ministria e Shëndetësisë (MSh), ka bërë me dije se ambasadori norvegjez ka hënë se është shumë i kënaqur me prezantimin publik të punës së MSh-së dhe të menaxhimit të situatës me pandeminë Covid-19, e cila po sfidon edhe sistemet më të avancuara shëndetësore.

Ai, po ashtu, ka thënë se populli i Norvegjisë, përpos kontributit në vlerë prej 500 mijë eurosh në kuadër të fondit të Bashkimit Evropian në ndihmë për Kosovën, është i gatshëm që edhe në të ardhmen të kontribuojë për çfarëdo që paraqitet nevoja në kuadër të ndihmesës për shëndetin publik.

Ndërsa, ministri në detyrë i MSh-së, Arbën Vitia e ka falënderuar ambasadorin e Norvegjisë për kontributin e dhënë, duke thënë se gjithë kjo punë e bërë është falë angazhimit ekipor në radhë të parë të punonjësve shëndetësorë, si dhe të gjithë akterëve të tjerë të përfshirë në prevenimin e përhapjes së pandemisë e cila është kërcënim për të gjithë botën.

Më tutje, Vitia e ka njoftuar ambasadorin norvegjez edhe me kapacitetet aktuale të Kosovës si dhe parapërgatitjet për të ngritur këto kapacitete që të jemi të gatshëm për t’u ballafaquar me të gjitha skenarët.

Njëkohësisht, Vitia e ka njoftuar mysafirin për ofrimin e ndihmës nga ana e punonjësve shëndetësorë për të gjitha komunitetet në çdo komunë të vendit dhe se po përdoren protokollet më efektive për trajtimin e pacientëve.

Aktualisht në Kosovë janë 145 persona të prekur nga sëmundja Covid-19. 24 pacientë janë shëruar ndërsa janë regjistruar 3 raste të vdekjeve.

Lajme të sponsorizuara

Të fundit
Gazmend Abrashi nga Aleanca për Ardhmërinë e Kosovës ka mbajtur…