Ministri në detyrë i Shëndetësisë Arben Vitia, duke folur për 480 raste të infektuara me Covid-19 në Kosovë, tha se situata po menaxhohet.

Ai theksoi se aktualisht në Kosovë janë në dispozicion 2600 teste për Covid-19.

“Situata është e menaxhueshme por rastet e reja janë raste të infektuara më herët. Kësisoj, jemi detyruar të marrim masa të reja më rigoroze e strikte, në kuptimin e mbajtjes së distancës sociale që mos të rriten rastet. Nuk e dimë akoma në cilën fazë jemi, por duke parë në vendet tjera, është fat që nëse s’marrim masa të vazhdueshme do të hyjmë në një fazë që s’do t’ia doja asnjë vendi, se po të hyjmë në këtë fazë, gjithçka bëhet e pamenaxhueshme”, tha Vitia.

Sipas ministrit Vitia, edhe pse përmirësimi i motit është lajm i mirë, masat në qytete nuk u respektuan dhe nisi relaksimi, që sipas tij, është i panevojshëm.

“Prandaj u detyruam t’i marrim këto masa. Kemi shpresë që pas një kohe të filloj të zbres numri i të infektuarve”, u shpreh Vitia në “KTV”.

Pjesa më e madhe e të infektuarve, tha Vitia, janë në gjendje relativisht të mirë.

Rreth 100 respiratorë, tha Vitia, janë në dispozicion. “Në ndërkohë janë edhe 50 respiratorë nga fondet që ka ndarë qeveria për Covid-19. Nga fondet e EU dhe OBSH-së, pritet të vijnë edhe 50 respiratorë. Në fillim të majit do të vijnë edhe disa respiratorë dhe ideja është që t’i kemi diku mbi 250 respiratorë”, tha aia.

Ministri në detyrë Arben Vitia tha se “në dispozicion janë rreth 2600 teste”. “2000 mijë teste vijnë nga një operator ekonomikë, deri në 3 mijë teste vijnë nga UNDP”, tha Vitia.

Vitia thotë se 1 mijë teste vijnë nesër në Kosovë.

Shtoi se “në qeverinë e Luksemburgut, ka ndarë 2 milionë euro për Kosovën për ta luftuar Covid-19”, “Këto do të shfrytëzohen për teste”, tha Vitia.