![](https://www.epokaere.com/wp-content/uploads/2020/04/Edouard_Philippe-scaled.jpg)
Kryeministri francez: Pa një vaksinë, Franca s’do t’i rikthehet normalitetit
Kryeministri francez Edouard Philippe tha se Franca nuk do të kthehet në normalitet për një kohë të gjatë. “Të imagjinosh se situata po bëhet më e mirë do të ishte gabim”, tha kryeministri në konferencën e tij të shtypit të dielën e 19 prillit.
Philippe tha se Franca kishte kaluar kulmin e epidemisë, por vendi nuk do të kthehet shpejt në normalitet sepse tani nuk ka vaksinë dhe asnjë trajtim, paralajmëroi ai.
Franca ka pezulluar të gjithë biznesin jothelbësor deri më 11 maj.
Philippe tha se 11 maji nuk do të jetë fundi i mbylljes, por një fazë e re. Ai tha se masat pas 11 majit do të shpallen brenda dy javësh dhe do të bazohen në tre parime kryesore: distancimin shoqëror, testimin masiv dhe izolimin e njerëzve që kanë rezultuar pozitiv.
Kryeministri tregoi se shkollat nuk do të rihapen në të gjithë vendin pas 11 majit dhe, në çdo rast, do të funksionojnë ndryshe.
Kryeministri njoftoi gjithashtu se vizitat në shtëpitë e të moshuarve do të autorizohen që nga e hëna, por do të kufizohen rreptësisht. Kontakti fizik nuk do të lejohej.
Deri më tani në Francë janë shënuar 19 718 viktima nga Covid-19 dhe janë infektuar 152 894 persona. /Ora News.tv/