Një grua shtatzënë nga Gjakova ka ndërruar jetë në mëngjesin e sotëm në Klinikën Infektive të QKUK-së pas infektimit me Covid-19. Viktima e moshës 40-vjeçare kishte pasur probleme neurologjike dhe ishte në javën e 28-të të shtatzënisë. Për gruan e vdekur dhe foshnjën e saj, ngushëllime ka shprehur ish-kryetarja e komunës së Gjakovës, Mimoza Kusari-Lila.

Lajmin për vdekjen e kësaj gruaje e ka konfirmuar edhe Klinika Infektive e QKUK-së.

“Klinika Infektive e QKUK-së njofton se gjatë orëve të para të datës 21.04.2020 në Mjekimin Intensiv të kësaj klinike ka ndërruar jetë pacientja V.P. me vendbanim në Gjakovë (1980) e diagnostikuar me Covid-19. E njëjta, ishte shtatzënë dhe po trajtohej në mjekimin intensiv të klinikës që prej datës 15 prill 2020”, thuhet në njoftimin e Infektives.

E ndjera ishte shtatzënë dhe ka lënë pas dy fëmijë. Por prekës është mesazhi që burri i kësaj të ndjere ka publikuar në rrjetet sociale kushtuar gruas së tij.

“Aq shumë e deshe jetën saqë luftove deri në momentin e fundit për jetën tande bashkë me jetën e foshnjës në kraharorin tand. Tani me foshnjën tande në parajsë gëzoni lumturinë e jetës së amshuar. Ishe një grua, nënë, bijë, motër, nuse shumë e qetë, plotë lumturi, dashuri, kujdes për të tjerët. Tani ju, nanë e foshnje, jeni engjëj në qiell, të cilët luteni për ne e na mbroni. Mos na harro”, janë fjalët e dhimbshme që bashkëshorti i së ndjerës i ka shkruar në kujtim të gruas së tij. /Epoka e re/