Kryetari i Partisë Demokratike të Kosovës (PDK), Kadri Veseli, ka komentuar raportin i fundit të organizatës së njohur Reporterë Pa Kufi për renditjen e lirisë së shtypit, ku sipas tij ku raport tregon se edhe këtë vit ka një përmirësim të lirisë se medieve në vendin tonë

Veseli ka thënë se liria e mediave është një ndër shtyllat themelore të sistemit liberal demokratik që kemi ndërtuar me sukses në këto dy dekada liri.

“Ne krenohemi që Kosova, edhe pse me sfidat e jashtëzakonshme të rindërtimit pas luftës, të shtetndërtimit pas shpalljes së pavarësisë si dhe të përpjekjeve të parreshtura për të konsoliduar sovranitetin dhe subjektivitetin tonë ndërkombëtar, ia ka dalë të ndërtojë një realitet mediatik të lirë e pluralist më të mirë se shumë shtete që kanë jetëgjatësi shumë më të madhe se yni”, ka shkruar Veseli në llogarinë e vet në “Facebook”.

Postimi i plotë i Veselit:

Raporti i fundit i organizatës së njohur Reporterë Pa Kufi për renditjen e lirisë së shtypit tregon edhe këtë vit një përmirësim të mëtejshëm me pesë vende të gjendjes në Kosovë duke dalë goxha më mirë se të gjithë shtetet me të cilët kufizohet. Liria e mediave është një ndër shtyllat themelore të sistemit liberal demokratik që kemi ndërtuar me sukses në këto dy dekada liri.

Ne krenohemi që Kosova, edhe pse me sfidat e jashtëzakonshme të rindërtimit pas luftës, të shtetndërtimit pas shpalljes së pavarësisë si dhe të përpjekjeve të parreshtura për të konsoliduar sovranitetin dhe subjektivitetin tonë ndërkombëtar, ia ka dalë të ndërtojë një realitet mediatik të lirë e pluralist më të mirë se shumë shtete që kanë jetëgjatësi shumë më të madhe se yni.

Ky fakt vlen të bëhet i ditur në mënyrë të veçantë për ata politikanë e opinionbërës të Kosovës që karrierën e tyre e kanë ndërtuar duke mohuar, nëpërkëmbur apo shpërfillur arritjet e mëdha të Kosovës. Vlen për të përgënjeshtruar ata që e kanë nxirë e njollosur padrejtësisht shtetin tonë kudo ku kanë folur, brenda e jashtë vendit.