Agjencia e Metrologjisë së Kosovës, që funksionon në kuadër të Ministrisë së Tregtisë dhe Industrisë (MTI), ka verifikuar peshoret e mullinjve para sezonit të korrje-shirjeve, që fermerët të jenë të mbrojtur dhe peshat të maten saktë.

Inspektorati i Tregut dhe Agjencia e Metrologjisë kanë kryer verifikimin e jashtëzakonshëm të mjeteve matëse, ku është bërë kontrolli ligjor.

Kryeshefi i Agjencisë së Metrologjisë, Ferki Fejza, ka deklaruar se ky është edhe një hap tutje në mbrojtjen e konsumatorit, që sipas tij, është prioritet i ministrit Vesel Krasniqi.

“Fejza tha se verifikimet të tilla do të bëhen edhe në ditët e ardhshme, që të mbrohet konsumatori nga mashtrimet e mundshme. Inspektorati dhe Agjencia e Metrologjisë së Kosovës bëjnë thirrje që të gjithë përdoruesit e mjeteve matëse të verifikohen që të zbatohet ligji për Metrologji”, thuhet në njoftimin e MTI-së. (A. M / Epoka e re)