Kryetari i komunës së Malishevës, Ragip Begaj, të premten ka mbajtur mbledhjen e rregullt të Këshillit të Drejtorëve, ku temë diskutimi ishin ecuria e realizimit të projekteve, apo investimeve kapitale, si dhe zbatimi i masave mbrojtëse në raport me pandeminë me Covid-19.

Me këtë rast, drejtorët e drejtorive përkatëse, kanë raportuar për ecurinë e realizimit të projekteve, si dhe me sfidat që këtë vit janë duke u përballur për shkak të pandemisë, sepse janë shënuar vonesa të mëdha gjatë muajve mars, prill dhe maj, dhe si pasojë disa projekte janë vonuar në realizim, kryesisht projektet dy vjeçare.

Po ashtu në këtë mbledhje, është diskutuar edhe për zbatimin e masave mbrojtëse në raport me pandeminë me Covid-19. Edhe pse Malisheva nuk ka asnjë rast aktiv me koronavirus, zbatimi i masave mbrojtëse dhe i të gjitha rekomandimeve dhe vendimeve të institucioneve përgjegjëse, është obligative.

Kryetari Begaj, për të dy temat e diskutuara, ka kërkuar nga drejtoritë përkatëse, angazhim maksimal, si në realizimin e projekteve, ashtu edhe në zbatimin e masave mbrojtëse.

Për këtë të fundit, Begaj ka urdhëruar mbajtjen e detyrueshme të maskave për të gjithë stafin e administratës, si dhe për të gjithë ata që duan të kryejnë shërbime brenda komunës.

Edhe me këtë rast, u kërkua që edhe të gjitha bizneset private ti zbatojnë masat, me theks të veçantë sektori i gastronomisë, si dhe u kërkua angazhim edhe më i madh nga ana e inspektoratit, që të mbikëqyr zbatimin e këtyre masave.

(Q.R / Epoka e re)