![](https://www.epokaere.com/wp-content/uploads/2020/07/faik-konica-1-1600x1200-1.jpg)
Nga shtatori mund të fillojë mësimi i pjesshëm në shkollat e Kosovës
Kur ka mbetur vetëm një muaj nga fillimi i vitit të ri shkollor, Ministria e Arsimit, e Shkencës dhe e Teknologjisë (MAShT) e Kosovës ende nuk e ka të qartë se si do të fillojë procesi mësimor. Një opsion që po diskutohet e po përkrahet edhe nga SBAShK-u është rikthimi i pjesshëm në shkollë.
MAShT-i, në një përgjigje për “RTV Dukagjinin”, thotë se aktualisht në plan është rikthimi i nxënësve në ambientet shkollore, por nuk përjashtohet as opsioni për mësim nga distanca.
“Ministria e Arsimit dhe Shkencës në plan të parë ka rikthimin në ambiente shkollore dhe për këtë po bëhen përgatitje maksimale që mësimi të fillojë në mënyrë të rregullt. Megjithatë, për shkak të gjendjes së pandemisë, MAShT-i është e përgatitur ta fillojë edhe mësimin alternativ (mësimin në distancë) për nxënësit”, thuhet në përgjigjen e MAShT-i.
Edhe për SBAShK-un duhet të shqyrtohet mundësia e rikthimit në ambiente shkollore qoftë edhe pjesërisht.
Drejtoresha e Arsimit në Komunën e Prishtinës, Shpresa Shala, thotë se për komunën më e arsyeshme shihet rikthimi i pjesshëm në shkolla. “Mendohet se mësimi me gjysmë klase do të kishte qenë ideal, sidomos për klasat e ciklit të ulët, pra për klasat 1, 2, 3. Të bëhet një orar që një ditë të vijë një pjesë e klasës, ndërsa ditën tjetër pjesa tjetër e klasës”, ka propozuar Shpresa Shala.
Por si Komuna e Prishtinës nuk mendon edhe njohësi i çështjeve të arsimit, Rinor Qehaja, i cili mundësinë e rikthimit të pjesshëm në shkolla nuk e sheh si efektiv. “Unë nuk besoj në rikthim gjysmak. Rikthimi duhet të jetë i plotë ose mësimi të vazhdohet nga distanca. Në momentin kur fëmija ekspozohet ndaj ambientit shkollor atëherë është i paarsyeshëm që mësimi të kufizohet në një orar të shkurtuar”, ka thënë Qehaja.