Kryetari i Komunës së Prishtinës, Shpend Ahmeti, ka reaguar pas konfirmimit të aktakuzave ndaj Hashim Thaçit, Kadri Veselit, Rexhep Selimi dhe Jakup Krasniqit.

Në profilin e tij në “Facebook”, ai ka shkruar se akuzat e brendshme dhe luftërat politike në lidhje me gjykatën tani janë pa kurrfarë sensi.

Sipas tij, në këtë kohë dhe për këtë çështje nevojitet unitet dhe punë serioze.

Statusi i plotë i Ahmetit:

Pa paragjykuar rastet në Gjykatën Speciale, një gjë është e qartë. Individët do të gjykohen individualisht për të vlerësuar përgjegjësinë penale, por Kosova do të jetë në gjyqin publik mediatik ndërkombëtar.

Akuzat e brendshme dhe luftërat politike të brendshme në lidhje me gjykatën tani janë pa kurrfarë sensi.  Jo për shkak të personave të akuzuar por për shkak të Kosovës.

Nuk është koha as për poezi. Në këtë kohë dhe për këtë çështje nevojitet unitet dhe punë serioze. Pa dallim.  Krimet individuale në qoftë se kanë ndodhë kanë adresë.  Por kolektivisht duhet të dëshmojmë që Kosova ka qenë viktimë e jo agresor. Ne e dijmë, por bota nuk po funksionon ashtu.

Mos të lejojmë që dallimet e kundërshtimet politike individuale të bëjmë dëm edhe më tutje për shtetin tonë.