![](https://www.epokaere.com/wp-content/uploads/2020/11/hoti-9.jpg)
Hoti reagon për sulmin fizik ndaj infermierëve në Prizren, e quan gjest të shëmtuar
Kryeministri i Kosovës, Avdullah Hoti, ka reaguar ndaj rastit ku familjarët e pacientëve kanë sulmuar fizikisht infermierët në Spitalin e Prizrenit.
Ai ka thënë se ky është një gjest i shëmtuar, raporton “Epoka e re”.
“Ngjarja e mbrëmshme në Urgjencën e Spitalit të Prizrenit, ku familjarët kanë sulmuar fizikisht infermierët në detyrë është gjest i shëmtuar ndaj atyre që punojnë për të mbrojtur shëndetin dhe jetën e qytetarëve, përfshirë edhe të atyre që i kanë sulmuar”, ka shkruar Hoti në llogarinë e vet në “Facebook”.
Ai ka thënë se mjekët, infermierët dhe tërë personeli mjekësor e mbështetës, gjatë këtyre muajve sa po përballen me pandeminë Covid-19, kanë dëshmuar përkushtim të lartë që duhet vlerësuar, e jo sulmuar.
“Sulmet ndaj heronjve të kohës janë të turpshme dhe të pa pranueshme. E dënoj këtë sulm dhe çdo sjellje të pa dinjitetshme, e cila rrezikon integritetin fizik të personelit mjekësor. I ftoj organet e rendit që të vihen në mbrojtje të mantelbardhëve, ndërsa organet e drejtësisë që ta kryejnë detyrën e tyre shpejt”, ka shkruar kryeministri Hoti.