Nëse jeni tunduar nga disa oferta të qytezave italiane për të blerë shtëpi të vjetra me çmim €1 por ishit bezdisur për rinovimin e tyre nga e para, tashmë një tjetër ofertë vjen akoma më tunduese se e para.

Qyteza e Biccari, në juglindje të Puglia, shet edhe ajo shtëpi të zbrazura e të vjetëruara për €1, por ndryshe nga destinacionet e tjera ajo ofron edhe vende të gatshme për banim me çmime që nisin nga €7,500 deri në €10,000.

Shitjet janë pjesë e nismës së kryebashkiakut Gianfilippo Mignogna për të shpëtuar qytezën e tij të shpopulluar, pas largimit të qytetarëve për të gjetur punë në qytetet e mëdha të Italisë ose jashtë saj, kryesisht në SHBA.

Eksodi i ngadaltë ka dëmtuar popullatën e vendit që në vitet 1950 arrinte në 5,000.

“Ne kemi vetëm 2,000 rezidentë,” thotë ai për CNN. “Shpopullimi është një plagë e hapur, një fenomen i vazhdueshëm. Vendasit largohen dhe megjithse më parë ktheheshin për pushime, shumica e tyre nuk e bëjnë më. Shumë shtëpi janë të gatshme e të banueshme”.

Mignogna shton më tej: “Një ditë po ecja në qendrën e vjetër të qytetit dhe u trondita sesa shumë shtëpi të vogla e të bukura kanë mbetur mbyllur prej vitesh, me tabela për shitje apo dhënie me qera, që askush nuk i sheh”.

Kryebashkiaku shton se ka rreth dymbëdhjetë shtëpi që shiten për €1 dhe 20 të tjera “më të mbajtura”, por gjithsesi rreth 100 ndërtesa të zbrazura në Biccari kanë nevojë për banorë.

Platforma e tij promovuese shkruan: €1 për shtëpitë e lira, në të cilat banorëve të rinj u garantohet kthimi i 4000 eurove pas punës për rinovimin e tyre, mundësisht brenda tre vjetëve.

Biccari gjendet në rrëzë të malit më të lartë të rajonit Monte Cornacchia dhe pamja e tij shtrihet deri në detin Adriatik.

Vendi është i mbushur me rrënoja prehistorike dhe ferma të vjetra. Ai është themeluar nga romakët e lashtë dhe ka ende mbetjet e mureve fortifikuara dhe nje kullë vrojtimi ende në këmbë.

Biccari ka dhe një histori të errët rezistence teksa portat e vjetra mbajnë shenjat e betejave të vendasve kundër përfshirjes me forcë në shtetin “tiranik” të Italisë në vitet 1800.

Vendasit janë krenarë për trashëgiminë e tyre prej ‘banditi’.