Kërkesa që të krijohet një komisioni për përcjelljen e postave nga jashtë Kosovës, ka shkaktuar përplasje në mes anëtarëve të Komisionit Qendror të Zgjedhjeve (KQZ).

Përfaqësuesi i Vetëvendosjes në KQZ-së, Sami Kurteshi, ka thënë se votat duhet të mbërrijnë në kutinë postare të KQZ-së.

“Duhet të vendosim për çështjen e parë e cila është marrja e një vendimi për krijimin e një komisioni që përcjell postat jashtë Kosovës, si dhe caktimi i datës para ditës së zgjedhjeve për pranimin e postave deri në orën 19:00”, ka thënë Kurteshi.

Ndërkohë, përfaqësuesi i PDK-së në KQZ, Arianit Elshani dhe kryesuesja e KQZ-së, Valdete Daka, kanë thënë se votat duhet të mbërrijnë në “Fahun Postal”, Posta numër 6, pasi sipas tyre, ashtu parasheh ligji.

Po ashtu, përfaqësuesi i LDK-së në KQZ, Sami Hamiti, lidhur me këtë adresim për postat e shpejta, ka thënë që adresa e fundit është “Fahu Postal”.

“Adresa e fundit është Fahu Postal, posta më e shpejtë dhe çdo votë duhet të shkojë, pra posta numër gjashtë”, ka thënë Hamiti.