![](https://www.epokaere.com/wp-content/uploads/2020/12/tema-per-zgjedhjet.jpg)
Anulohen në tërësi votat për partitë boshnjake në shtatë komuna
Paneli Zgjedhor për Ankesa dhe Parashtresa ka anuluar në tërësi votat në zgjedhjet e 14 shkurtit, për subjektet politike boshnjake në komunat të banuara me shumicë serbe, siç janë Zubin Potoku, Shtërpca, Ranillugu, Graçanica, Parteshi, Kllokoti, Novobërda, Mitrovica e Veriut, Zveçani dhe Leposaviqi.
PZAP-ja ka miratuar pjesërisht apelet nga subjektet politike boshnjake Iniciativa Jonë (Nasha Iniciativa), Unioni Socialdemokrat (SDU) dhe Partia e Re Demokratike (NDS), të cilat kërkuan që të anulohen votat e ardhura nga komuniteti serb për partinë Komuniteti i Bashkuar – Adrijana Hoxhiq.
Me këtë vendim, PZAP-ja ka anuluar 4,205 vota të cilat i kishte siguruar subjekti politik boshnjak, i udhëhequr nga Adrijana Hoxhiq, në komunat e banuara me shumicë serbe.
Hoxhiq, sipas rezultatit përfundimtar të Komisionit Qendror të Zgjedhjeve, kishte fituar 6,422 vota apo një ulëse në Kuvendin e Kosovës.
Ndërkaq, koalicionit Vakat, i janë anuluar 583 vota, të cilat i ka fituar në këto komuna.
Unioni Socialdemorkat i Duda Bales, me këtë vendim të PZAP-së ka mbetur pa 165 vota si dhe Iniciativa Jonë ka humbur 9 vota, kurse Partia e Re Demokratike, 14 vota.
“Urdhërohet KQZ-ja që votat e përfshira në fletëvotimet e anuluara t’i largojë nga rezultati përfundimtar”, thuhet në vendim.
PZAP-i ka vendosur të anulojë mbi 800 vota për Iniciativën Rome, të cilat i kishte siguruar në komunat me shumicë serbe.
Iniciativa Rome ka siguruar 4,049 vota.
Përfaqësuesit politikë të komunitetit boshnjak, rom, ashkali dhe egjiptas pretendojnë se partia boshnjake“Komuniteti i Bashkuar Adrijana Hoxhiq” dhe “Iniciativa Rome” kanë siguruar vota në zgjedhjet e 14 shkurtit, me ndihmën e Listës Serbe.
Komunitetet joserbe thonë se këto dy parti në zgjedhjet e 14 shkurtit kanë marrë vota në vendbanime ku nuk jetojnë këto komunitete.
Kundër këtij vendimi, palët kanë të drejtë ankese brenda 24 orëve në Gjykatën Supreme.