![](https://www.epokaere.com/wp-content/uploads/2021/04/fajde.jpg)
Arrestohet një fajdexhi në Pejë
Policia e Kosovës, konkretisht Drejtoria për Hetimin e Krimeve Ekonomike dhe Korrupsionit (DHKEK) pas zhvillimit të hetimeve disamujore dhe si rezultat i provave materiale dhe dëshmive relevante, në bashkëpunim dhe koordinim me Prokurorinë kompetente, ka realizuar të martën operacionin policor mbi dyshimin e bazuar se disa persona janë përfshirë në veprën penale “Fajde”. “Referuar hetimeve të zhvilluara dhe urdhëresës së Gjykatës Themelore në Pejë, në proces janë aplikuar masat e fshehta teknike, ku gjatë monitorimit të këtyre masave janë siguruar informacione se personi (B.U., 1963) nga rajoni i Pejës, tanimë i arrestuar, dyshohet se ka kryer veprën penale ‘Fajde’. I njëjti dyshohet se për veprën penale në fjalë ka përfituar shuma të larta parash nga persona të ndryshëm duke aplikuar përqindje të larta interesi, përderisa gjatë verifikimit ka rezultuar se është recidivist i kryerjes së veprave të ndryshme penale”, është thënë në njoftimin e Policisë së Kosovës.
Me vendim të prokurorit kompetent personi i dyshuar pas intervistimit është dërguar në mbajtje për 48 orë.