Xherdan Shaqiri ka thënë se ndihet shumë krenar dhe shumë i lumtur që iu bashkua Lyonit dhe se mezi pret ta nisë aventurën e re në Ligue 1.

Shaqiri iu bashkua të hënën Lyonit nga Liverpooli për një shumë rreth 11 milionë euro, duke i përfshirë edhe bonuset. Në bisedën e tij të parë si lojtar i Lyonit, përfaqësuesi i Zvicrës i lindur në Kosovë tha se kalimi në “Groupama Stadium” e bën të ndihet krenar.

“Ndihem shumë krenar dhe shumë i lumtur, sepse më në fund e nënshkrova kontratën. Tani jam zyrtarisht lojtar i Lyonit”, ka thënë Shaqiri për uebsajtin e klubit.

29-vjeçari nënshkroi kontratë trivjeçare me klubin e Ligue 1, ku besohet se do t’i përfitojë nga 4 milionë euro në vit. “Mezi pres t’ia filloj me këtë ekip dhe ta zbuloj klubin. Stadiumi është i mrekullueshëm. E parafytyroj të mbushur plot. Do të jetë e jashtëzakonshme”, ka shtuar ai.

Shaqiri i zhvilloi 63 ndeshje për Liverpoolin, të cilit i ishte bashkuar më 2018 nga Stoke City për 15 milionë euro. Por lëndimet luajtën rol të madh për të mos e lejuar atë ta ketë një vazhdimësi të dëshiruar në “Anfield”.

29-vjeçari e shijoi një Kampionat Evropian mahnitës Euro 2020 këtë verë, duke i ndihmuar Zvicrës ta arrijë një çerekfinale historike me tri gola të shënuara. Pas “Euro 2020”, Shaqiri i kishte kërkuar Liverpoolit ta lejonte të largohej.

Kjo do të jetë liga e katërt e madhe evropiane që Shaqiri do të luajë, pasi  në të kaluarën luajti për Bayern Munchen në Bundesligë dhe Interin në Serie A.