![](https://www.epokaere.com/wp-content/uploads/2021/09/haziri.jpg)
Përfundon mbledhja e kryesisë së LDK-së, Haziri: Fushata zgjedhore të zgjasë vetëm pesë ditë
Nënkryetari i Lidhjes Demokratike të Kosovës (LDK), Lutfi Haziri, ka bërë me dije para medieve se në mbledhjen e Kryesisë së kësaj partie është diskutuar që fushata zgjedhore të shkurtohet në pesë ditë të vetme.
“Sot u diskutua mbi çështjet që lidhen me procesin zgjedhor e 17 tetorit dhe iniciativën e LDK-së për shkurtimin e fushatës duke pasur parasysh situatën epidemiologjike. Duke e konsideruar të rëndësishme situatën me pandeminë dhe dështimin e qeverisë, ne jemi të gatshëm që fushatën me shkurtuar në pesë ditë të vetme duke ftuar edhe partitë politike që të ndërtojnë një kulturë konsensusi sepse jeta e qytetarit është më e rëndësishme. Nevoja e angazhimit të partive politike duhet të jetë në kulturën e konsensusit”.
“Kryetari ka biseduar edhe me partitë politike, ku presim që 17 tetori të jetë një ditë e bardhë, që qytetarët me votua dhe m’i respektua masat, dhe të largohet logjika që të shtyhen zgjedhjet. Kjo nuk bën me u lejuar që me u thyer Kushtetuta. Zgjedhjet lokale nuk mund dhe nuk ka autoritet që t’i shtyjë ato”, ka thënë Haziri.
I pyetur se nëse shtyhen zgjedhjet, ai tha se nuk ka arsye që të shtyhen zgjedhjet, ka arsye që të shkurtohet fushata.
Po ashtu, Haziri ka thënë se mund të krijohet një ambient që të shkurtohet fushata.
“Ne presim që sot gjatë takimit me presidenten me ardhur deri tek një koordinim”, është shprehur Haziri.