![](https://www.epokaere.com/wp-content/uploads/2020/07/vladimir-putin-1.jpg)
Rusia: NATO po kalon vijën e kuqe në Ukrainë
Rusia ka deklaruar se zgjerimi i infrastrukturës ushtarake të NATO’s në Ukrainë kalon një vijë të kuqe për Presidentin Vladimir Putin.
Por Rusia do të kundërpërgjigjet së bashku me Bjellorusinë për të mbrojtur sigurinë e tyre.
Presidenti bjellorus Aleksandër Lukashenko paralajmëroi për një përgjigje të përbashkët me Rusinë në stërvitjet ushtarake që përfshinin trupa nga vendet anëtare të NATO’s në Ukrainën fqinje.
“E shihni, ata po tërheqin trupat e NATO -s në Ukrainë. Nën maskën e qendrave të trajnimit ushtarak , ata në të vërtetë po krijojnë baza. Shtetet e Bashkuara po krijon baza ushtarake në Ukrainë. Është e qartë se ne duhet të reagojmë ndaj kësaj”.
Lukashenko tha se ai e ka diskutuar situatën në Ukrainë me Presidentin rus Vladimir Putin dhe kanë rënë dakord të ndërmarrin disa veprime.
“Presidenti rus dhe unë, nuk është tashmë një sekret, kemi mbajtur dhe po zhvillojmë bisedime për këtë çështje dhe kemi rënë dakord që duhen ndërmarrë veprime. Nëse nuk ndërhyjmë do të kemi një situatë të papranueshme në kufirin midis Bjellorusisë dhe Rusisë“.
Ukraina nuk është anëtare e Organizatës së Traktatit të Atlantikut të Veriut, por ka kërkuar prej kohësh që një ditë t’i bashkohet aleancës, një veprim të cilën Rusia e ka kundërshtuar.
Kievi filloi stërvitjet e përbashkëta ushtarake me SHBA dhe trupat e tjera anëtare të NATO-s javën e kaluar, ndërsa Rusia dhe Bjellorusia mbajtën stërvitje të përbashkëta që alarmuan Perëndimin.