Projekti amerikan për gasin, Haradinaj kërkon nga Kurti të distancohet nga Bislimi
Lideri i Aleancës për Ardhmërinë e Kosovës (AAK), Ramush Haradinaj, ka bërë me dije se të martën ia ka dërguar një letër kryeministrit Albin Kurtit, në të cilët ka shprehur shqetësimin e tij në lidhje me projektit amerikan të gazit.
Në letrën e tij, Haradinaj ka thënë se politizimi dhe njollosja e projektit të gazit, janë skandaloze, shumë të dëmshme dhe rrezikojnë zbatimin e një prej projekteve më të rëndësishme ekonomike dhe gjeopolitike për Kosovën dhe partneritetin me ShBA-në.
Po ashtu në këtë letër, Haradinaj ka kërkuar nga Kurti që të distancohet nga deklaratat e zëvendëskryeministrit Besnik Bislimi në lidhje me këtë projekt.
“Zëvendëskryeministri Bislimi e etiketoi dhe e përshkroi projektin e gazit si një projekt rus, mohoi vendimet e qeverive të mëparshme dhe dezinformoi publikun me shumë të pavërteta të dëmshme. Nga ju kryeministër pres distancim publik dhe thirrje në përgjegjësi të Zëvendëskryeministrit Bislimi, në të kundërtën e vlerësoj që qëndrimet e zëvendëskryeministrit dhe të kryeministrit janë në pajtueshmëri të plotë. Prandaj, në këto rrethana kërkesën për një takim konsultativ e konsideroj si të panevojshëm”, ka shkruar Haradinaj në letrën drejtuar Kurtit, të cilën e ka publikuar edhe në llogarinë e vet në “Facebook”.
Letra e plotë e Haradinajt:
Politizimi dhe njollosja e projektit të gazit është skandaloz, po rrezikohet projekti më i rëndësishëm ekonomik dhe gjeopolitik për Kosovën
(Letra që sot i kam dërguar kryeministrit Kurti)
I nderuar Kryeministër Kurti,
Në maj të vitit 2019, Qeveria e Republikës së Kosovës, e udhëhequr nga unë si Kryeministër i vendit, miratoi propozimin për të përfituar nga granti i Korporatës së Sfidave të Mijëvjeçarit (MCC) dhe për të mbështetur zhvillimin e Programit Kompakt. Si rezultat, ne krijuam dhe mbështetëm një ekip ekspertësh vendor dhe me ç’rast nënshkrova marrëveshjen e Fondit të Zhvillimit Kompakt (CDF).
Si rezultat, programi Kompakt u zhvillua në koordinim të plotë me prioritetet e Qeverisë së Kosovës, agjencisë MCC dhe politikat e Qeverisë Amerikane, dhe pas shumë konsultimeve me të gjithë akterët në sektorin e energjisë, u identifikuan projekte brenda programit për mbështetje për të cilat janë kryer studime të para-fizibilitetit, siç janë:
Zhvillimi i sektorit të gazit -Diversifikimi i sektorit të energjisë;
Balancimi i sistemit të gjenerimit përmes krijimit të rezervave të energjisë për rrjetin e transmisionit;
Fuqizimi i sektorit të energjisë.
Tani, konsideroj se zhvillimet që kanë pasuar me Qeverinë Kurti, politizimi dhe njollosja e projektit të gazit, janë skandaloze, shumë të dëmshme dhe rrezikojnë zbatimin e një prej projekteve më të rëndësishme ekonomike dhe gjeopolitike për vendin si dhe partneritetin me ShBA-në.
Zëvendëskryeministri Bislimi e etiketoi dhe e përshkroi projektin e gazit si një projekt rus, mohoi vendimet e qeverive të mëparshme dhe dezinformoi publikun me shumë të pavërteta të dëmshme.
Nga ju kryeministër pres distancim publik dhe thirrje në përgjegjësi të zëvendëskryeministrit Bislimi, në të kundërtën e vlerësoj që qëndrimet e zëvendëskryeministrit dhe të kryeministrit janë në pajtueshmëri të plotë. Prandaj, në këto rrethana kërkesën për një takim konsultativ e konsideroj si të panevojshëm.
Për më tepër, ne presim që qeveria të marrë vendimet e nevojshme për të mbështetur zhvillimin e projektit të Kompaktit bazuar në studimet e kryera deri më tani nga të gjithë aktorët e përfshirë.
Rekomandimet tona janë si më poshtë:
Projekti për zhvillimin e sektorit të gazit të mbështetet nga qeveria dhe të integrohet në planifikime strategjike.
Revidimi i strategjisë së energjisë të mos vonohet dhe të integroj në vetvete zhvillimin e infrastrukturës së gazit dhe kapaciteteve gjeneruese.
Përveç mbështetjes së Kompaktit për këtë projekt, Qeveria e Kosovës duhet të përkushtohet në avancimin e negociatave me BERZh-in dhe BE-në për të siguruar financimin e projektit të gazit.
Qeveria e Kosovës të fillon krijimin e kushteve për krijimin e Operatorit të Sistemit të Transmetimit (OST).
Të mbështetet studimet e mëtejshme për komponentën e prodhimit të gazit në energji për të adresuar nevojat për rezerva dytësore dhe terciare për të balancuar sistemin e rrjetit të transmisionit.
Jam gjithashtu në dijeni që zbatimi i projekteve me interes strategjik për vendin kërkon kohë dhe qasje në financa, prandaj presim që studimet shtesë që janë duke u zhvilluar të ndihmojnë në matjen e këtyre kërkesave.
Në fund, mbështes përpilimin e programit kompakt siç rekomandohet në studimin e para-fizibilitetit dhe shpresoj se rezultatet e fizibilitetit do të vlerësojnë kushtet e tranzicionit të prodhimit të energjisë në Kosovë, nga thëngjilli në gaz, dhe potencialisht në burime të tjera që janë më miqësore për mjedisin.
Sinqerisht,
Ramush Haradinaj
Kryetar i Aleancës për Ardhmërinë e Kosovës