![](https://www.epokaere.com/wp-content/uploads/2019/09/tahiri-1.jpg)
Tahiri reagon pas vendimit për pezullimin e vendimit të Kuvendit për KPMShCK-në
Gjykata Kushtetuese të mërkurën ka marrë vendim për caktimin e masës së përkohshme ndaj vendimit të Kuvendit të Kosovës për shkarkimin e anëtarëve të Këshillit të Pavarur Mbikëqyrës për Shërbimin Civil të Kosovës (KPMShCK).
Me këtë rast, Gjykata Kushtetuese ka pezulluar vendimin e Kuvendit për shkarkimin e anëtarëve të këtij këshilli.
Ndaj këtij vendimi ka reaguar iniciuesi i kërkesës për vlerësimin e kushtetutshmërisë se vendimit të Kuvendit për shkarkimin e KPMShCK-së, Abelard Tahiri nga PDK-ja.
Ai ka thënë se është i lumtur që Gjykata Kushtetuese i ka dhënë të drejt çështjes se ngritur nga PDL-ja lidhur me këtë shkarkim e paligjshëm të anëtarëve të KPMShCK-së.
“Si në këtë rast, Partia Demokratike e Kosovës do të qëndrojë gjithmonë e pa lëkundur në mbrojtje të kushtetutshmërisë dhe ligjit”, ka shkruar Tahiri në llogarinë e vet në “Facebook”.
Postimi i plotë i Tahirit:
Afër katër muaj më parë, ne paralajmëruam mazhorancën e udhëhequr nga Lëvizja Vetëvendosje se shkarkimi i jashtëligjshëm i pesë anëtarëve të Këshillit të Pavarur Mbikëqyrës për Shërbimin Civil, ishte kundërkushtetues, si dhe një përpjekje e hapur për të ndërhyrë politikisht në mënyrë brutale, në një institucion të pavarur e të bazuar shumë qartë në ligj.
Si deputet iniciues, jam shumë i lumtur që Gjykata Kushtetuese i ka dhënë të drejtë çështjes së ngritur nga Partia Demokratike e Kosovës lidhur me këtë shkarkim të paligjshëm, duke prishur kalkulimin e këtij pushteti që s’pyet për parime dhe ligjshmëri.
Sot kjo gjykatë, aprovoi kërkesën për masën e përkohshme, respektivisht vendosi pezullimin e menjëhershëm të vendimit të Kuvendit, i cili i shkarkoi pesë anëtarët e Këshillit të Pavarur Mbikëqyrës për Shërbimin Civil. Ne jemi të bindur se i tillë do të jetë edhe vendimi meritor për vlerësimin e këtij rasti.
Kjo është një fitore e të drejtës mbi padrejtësinë, e meritës mbi arrogancën. Fitore e demokracisë si vlerë mbi keqpërdorimin në emër të saj.
Institucioni i Këshillit të Pavarur Mbikëqyrës, është aty për të mbrojtur nëpunësit civil dhe të drejtat e tyre. Ai, siç çdo institucion tjetër i pavarur e kushtetues, nuk mund dhe s’do të lejojmë të shndërrohet në mjet të pushtetit për shantazh ndaj nëpunësve publik në Republikën e Kosovës.
Si në këtë rast, Partia Demokratike e Kosovës do të qëndrojë gjithmonë e pa lëkundur në mbrojtje të kushtetutshmërisë dhe ligjit.